ວັນທີ 29 ມິຖຸນານີ້ ຢູ່ນະຄອນຫຼວງປັກກິ່ງ, ທ່ານຫວາງຢີ້ ລັດຖະມົນຕີກະຊວງການຕ່າງປະເທດຈີນ ແລະ ທ່ານອາລານ ປີເຕີ ຄາເຢຕາໂນ ລັດຖະມົນຕີກະຊວງການຕ່າງປະເທດຟິລິບປິນໄດ້ຮ່ວມຖະແຫຼງຂ່າວຫຼັງພົບປະກັນ.
ທ່ານຫວາງຢີ້ ກ່າວວ່າ: ພວກຂ້າພະເຈົ້າເປັນເອກະສັນກັນເຫັນດີໃຫ້ແກ້ໄຂບັນຫາທາງທະເລໂດຍຜ່ານການຫາລືຢ່າງມີໄມຕີຈິດລະຫວ່າງສອງຝ່າຍ, ເສີມຂະຫຍາຍບົດບາດຂອງກົນໄກປຶກສາຫາລືສອງຝ່າຍ ແລະ ກົນໄກຮ່ວມມືລະຫວ່າງຕຳຫຼວດທະເລ ກ່ຽວກັບບັນຫາທະເລຈີນໃຕ້ທີ່ໄດ້ສ້າງຂຶ້ນແລ້ວນັ້ນຢ່າງເຕັມທີ່, ເພີ່ມທະວີການສົນທະນາແລະຮ່ວມມືກ່ຽວກັບບັນຫາທະເລ, ເສີມສ້າງຄວາມໄວ້ເນື້ອເຊື່ອໃຈກັນຢ່າງບໍ່ຢຸດຢັ້ງ, ຮ່ວມຄວບຄຸມຂໍ້ວິວາດກັນ, ປົກປັກຮັກສາສັນຕິພາບ ແລະ ສະຖຽນລະພາບຂອງທະເລຈີນໃຕ້ ແລະຊຸກຍູ້ສາຍພົວພັນລະຫວ່າງສອງປະເທດໃຫ້ພັດທະນາຢ່າງປອດໃສ ແລະ ໜັກແໜ້ນ.
ທ່ານຫວາງຢີ້ ກ່າວຕື່ມວ່າ: ຟິລິບປິນເປັນປະເທດປະທານໝູນວຽນອາຊຽນໃນປີນີ້, ຂະນະທີ່ຈີນກໍສຸມກຳລັງສະໜັບສະໜູນຟິລິບປິນຈັດກອງປະຊຸມຮ່ວມມືອາຊີຕາເວັນອອກຕ່າງໆໃນປີນີ້ໃຫ້ດີ, ຊຸກຍູ້ສາຍພົວພັນລະຫວ່າງຈີນ-ອາຊຽນ ແລະ ການຮ່ວມມືອາຊີຕາເວັນອອກໃຫ້ພັດທະນາກ້າວໄປໜ້າຢ່າງບໍ່ຢຸດຢັ້ງ.