ກອງປະຊຸມປະຈຳປີ"ເຄືອຂ່າຍຕົວເມືອງທີ່ມີຫົວຄິດປະດິດສ້າງໂລກ"ຄັ້ງທີ11ຂອງອົງການອຸຍເນັສໂກສະຫະປະຊາຊາດໄດ້ຈັດຂຶ້ນຢູ່ເມືອງເອັນຈຽນເລັສບານສຂອງປະເທດຝຣັ່ງໃນວັນທີ30ມິຖຸນາຜ່ານມາ, ຜູ້ຕາງໜ້າຕົວເມືອງທີ່ມີຫົວຄິດປະດິດສ້າງທົ່ວໂລກໄດ້ເຕົ້າໂຕມກັນ, ຈະໃຊ້ເວລາ3ມື້ເພື່ອຮ່ວມກັນປຶກສາຫາລືກ່ຽວກັບເຮັດແນວໃດນຳໃຊ້ຫົວຄິດປະດິດສ້າງຊຸກຍູ້ການພັດທະນາແບບຍືນຍົງຂອງຕົວເມືອງ.
"ເຄືອຂ່າຍຕົວເມືອງທີ່ມີຫົວຄິດປະດິດສ້າງໂລກ"ສ້າງຕັ້ງຂຶ້ນໃນປີ2004, ເປັນສະຫະພັນເຄືອຂ່າຍຕົວເມືອງສາກົນທີ່ມີຈຸດປະສົງເຊື່ອມຕໍ່ຕົວເມືອງຕ່າງໆໃນໂລກທີ່ຖືຫົວຄິດປະດິດສ້າງແລະວັດທະນະທຳເປັນປັດໄຈຕົ້ນຕໍໃນການພັດທະນາເສດຖະກິດ, ເພື່ອຊຸກຍູ້ການພັດທະນາເສດຖະກິດ,ສັງຄົມແລະວັດທະນະທຳ. ປັດຈຸບັນ, ມີ116ຕົວເມືອງຈາກ54ປະເທດແລະເຂດແຄວ້ນໄດ້ເຂົ້າເປັນສະມາຊິກຂອງອົງການດັ່ງກ່າວ.
ທ່ານນາງອີຣີນາ ໂບໂກວາ, ຜູ້ອຳນວຍການໃຫຍ່ອົງການອຸຍເນັສໂກສະຫະປະຊາຊາດກ່າວວ່າ, "ເຄືອຂ່າຍຕົວເມືອງທີ່ມີຫົວຄິດປະດິດສ້າງໂລກ"ໄດ້ປະຕິບັດຕາມທັດສະນະຂອງອົງການອຸຍເນັສໂກ, ຈັດເອົາວັດທະນະທຳ, ການຄົ້ນຄວ້າແລະການປະດິດສ້າງໃໝ່ໄວ້ໃນຖານະແກນກາງໃນການພັດທະນາສັງຄົມ. ຕົວເມືອງມີບົດບາດສຳຄັນໃນການຊຸກຍູ້ສັນຕິພາບແລະການພັດທະນາແບບຍືນຍົງຂອງໂລກ, ຫວັງວ່າ"ເຄືອຂ່າຍຕົວເມືອງທີ່ມີຫົວຄິດປະດິດສ້າງໂລກ"ຈະສືບຕໍ່ແບ່ງປັນບົດຮຽນ, ຮ່ວມກັນຊຸກຍູ້ການຮ່ວມມືດ້ານວັດທະນະທຳ, ເພີ່ມທະວີຄວາມສາມາດໃນການປະດິດສ້າງໃໝ່ແລະການພັດທະນາແບບຍືນຍົງ.
 |
