ວັນທີ 1 ກໍລະກົດນີ້, ຖ້ຽວບິນMU2569ຂອງບໍລິສັດການບິນຕາເວັນອອກຈີນສາຂາຢຸນນານບັນທຸກຜູ້ໂດຍສານ 128 ຄົນ ບິນຈາກປັກກິ່ງ, ຜ່ານເມືອງຄຸນມິງ ມຸ່ງໜ້າສູ່ເມືອງຊຽງໄໝ່ປະເທດໄທ, ເຊິ່ງສະແດງໃຫ້ເຫັນວ່າ ບໍລິສັດດັ່ງກ່າວ ໄດ້ເປີດເສັ້ນທາງບິນປັກກິ່ງ-ຄຸນມິງ-ຊຽງໄໝ່ຢ່າງເປັນທາງການ.
ຊຽງໄໝ່ແມ່ນເມືອງສຳຄັນທາງພາກເໜືອຂອງໄທ, ດິນຟ້າອາກາດດີ, ທິວທັດສວຍງາມ, ທັງມີຊັບພະຍາກອນທຳມະຊາດອຸດົມສົມບູນ ສາມາດດຶງດູດນັກທ່ອງທ່ຽວເປັນຈຳນວນຫຼວງຫຼາຍ. ຄຽງຄູ່ກັບການໄປມາຫາສູ່ກັນລະຫວ່າງຈີນແລະໄທເຂົ້າສູ່ລວງເລິກຢ່າງບໍ່ຢຸດຢັ້ງ, ຈຳນວນຄົນຈີນທີ່ໄປທ່ຽວຫຼືເຮັດທຸລະກິດຢູ່ໄທກໍເພີ່ມຂຶ້ນທຸກປີ, ເມືອງຊຽງໄໝ່ແມ່ນແຫຼ່ງທ່ອງທ່ຽວໃໝ່ທີ່ມີເອກະລັກຂອງໄທນອກຈາກນະຄອນຫຼວງບາງກອກ, ເກາະສະເໝີຍ ກໍຄືພູເກັດ, ແລະເລີ່ມໄດ້ຮັບຄວາມນິຍົມໃນຕະຫຼາດທ່ອງທ່ຽວຂອງໄທ.
ຜູ້ຮັບຜິດຊອບທີ່ກ່ຽວຂ້ອງຂອງບໍລິສັດການບິນຕາເວັນອອກຈີນສາຂາຢຸນນານກ່າວວ່າ, ການເປີດບໍລິການເສັ້ນທາງການບິນດັ່ງກ່າວ ຈະເສີມຂະຫຍາຍບົດບາດອັນຕັ້ງໜ້າຕໍ່ການເຊື່ອມຕໍ່ກັບໃຈກາງຂອງ "ໜຶ່ງແລວທາງໜຶ່ງເສັ້ນທາງ", ແລະລົງເລິກການແລກປ່ຽນກັບປະເທດຢູ່ຕາມເສັ້ນທາງສາຍໄໝທາງທະເລ.
ບໍລິສັດການບິນຕາເວັນອອກຈີນສາຂາຢຸນນານຍັງມີແຜນຈະເປີດເສັ້ນທາງການບິນຄຸນມິງ-ມານີລາໂດຍກົງພາຍໃນປີນີ້ນຳອີກ.