ກອງປະຊຸມຄະນະກຳມະການມໍລະດົກໂລກ ອົງການການສຶກສາ, ວິທະຍາສາດ ແລະ ວັດທະນະທຳ ສະຫະປະຊາຊາດ ຫຼື ອຸຍເນັສໂກ ຄັ້ງທີ 41 ໄດ້ຈັດຂຶ້ນຢູ່ເມືອງຄຣາໂຄ ປະເທດໂປໂລຍ ໃນຕອນຄ່ຳວັນທີ 2 ກໍລະກົດນີ້.
ກອງປະຊຸມດັ່ງກ່າວຍົກໃຫ້ເຫັນວ່າ: ປີນີ້ມີ 34 ໂຄງການໄດ້ສະເໜີເຂົ້າເປັນມໍລະດົກໂລກ, ໃນນີ້ມີ 7 ໂຄງການມໍລະດົກທຳມະຊາດ, 26 ໂຄງການມໍລະດົກວັດທະນະທຳ ແລະ 1 ໂຄງການທັງທຳມະຊາດແລະວັດທະນະທຳ. ຂະນະທີ່ ສປ ຈີນຈະສະເໜີ ເຂີເຂີຊີລີ ຢູ່ແຂວງຊິງໄຫ ແລະ ເກາະກູລ້າງ ແຂວງຝູຈ້ຽນ ເຂົ້າເປັນມໍລະດົກທຳມະຊາດໂລກ ແລະ ມໍລະດົກວັດທະນະທຳໂລກ.
ກອງປະຊຸມດັ່ງກ່າວຈະດຳເນີນເປັນເວລາ 11 ວັນ ໂດຍມີຜູ້ແທນ 3.000 ຄົນຈາກ 137 ປະເທດເຂົ້າຮ່ວມ. ປັດຈຸບັນ, ທົ່ວໂລກມີມໍລະດົກໂລກ 1.052 ແຫ່ງ, ໃນນີ້ມໍລະດົກວັດທະນະທຳ 814 ແຫ່ງ, ມໍລະດົກທຳມະຊາດ 203 ແຫ່ງ ແລະ ມໍລະດົກທັງທຳມະຊາດແລະວັດທະນະທຳ 35 ແຫ່ງ.
