ຕາມຂ່າວCRI: ຫວ່າງມໍ່ໆມານີ້, ອົງການສຳຫຼວດຄົ້ນຄວ້າຕະຫຼາດທີ່ມີອິດທິພົນຫຼື IDC ໄດ້ເປີດເຜີຍປະລິມານການຈຳໜ່າຍມືຖືສະມາດໂຟນຢູ່ໃນຕະຫຼາດຈີນໃນໄຕມາດທຳອິດຂອງປີນີ້ວ່າ: ອັດຕາສ່ວນມືຖືຍີ່ຫໍ້ຮວາເຫວີຍທີ່ຈີນຜະລິດກວມເອົາ 20%, OPPO 18,2% ແລະ vivo 14,1% ເຊິ່ງຢືນຢູ່ 3 ອັນດັບນຳໜ້າ;ສ່ວນມືຖືຍີ່ຫໍ້ Apple ກວມ 9,2% ຢູ່ອັນດັບທີ 4.
ມືຖືສະມາດໂຟນ 5 ຍີ່ຫໍ້ທີ່ມີປະລິມານການຈຳໜ່າຍຫຼາຍຢູ່ຕະຫຼາດຂອງໂລກນັ້ນ, ຍີ່ຫໍ້ຮວາເຫວີຍ OPPO ແລະ vivo ຢູ່ອັນດັບທີ 3, 4 ແລະ 5 ຕາມລຳດັບ ຖັດຈາກຍີ່ຫໍ້ຊຳຊຸງແລະ Apple . ຂະນະທີ່ໃນວິສາຫະກິດ 10 ແຫ່ງນຳໜ້າທີ່ກວມອັດຕາສ່ວນຕະຫຼາດມືຖືສະມາດໂຟນຂອງໂລກໃນໄຕມາດທຳອິດປີນີ້ໄດ້ກວມເອົາວິສາຫະກິດ 6 ຍີ່ຫໍ້ທີ່ຈີນຜະລິດ. ສ່ວນ 5 ປີກ່ອນໜ້ານີ້, ຍີ່ຫໍ້ຈາກຈີນບໍ່ຕິດຢູ່ໃນ 5 ອັນດັບຄືດັ່ງກ່າວ.
5 ປີຜ່ານມາ,ມືຖືຈີນບໍ່ພຽງແຕ່ໄດ້ຮັບຄວາມນິຍົມຊົມຊອບຈາກປະຊາຊົນຈີນເທົ່ານັ້ນ,ແຕ່ໄດ້ຂະຫຍາຍໄປທົ່ວໂລກຢ່າງກວ້າງຂວາງກວ່າເກົ່າ ແລະໄດ້ຮັບຄວາມເຊື່ອໝັ້ນຈາກຕະຫຼາດສາກົນ.