ຕາມຂ່າວສານຊິນຮວາ: ວັນທີ 2 ກໍລະກົດນີ້, ທ່ານລູ້ຄ່າງ ໂຄສົກກະຊວງການຕ່າງປະເທດຈີນໄດ້ຕອບຄຳຖາມນັກຂ່າວກ່ຽວກັບກຳປັ່ນຕ້ານຂີປະນາວຸດ "ສເຕີເຊີມ" ຂອງອາເມລິກາທີ່ເດີນທາງເຂົ້ານ່ານທະເລໝູ່ເກາະຊີ່ຊ່າຈີນວ່າ, ເປັນເລື່ອງບັງອາດທີ່ກຳປັ່ນຮົບຕ້ານຂີປະນາວຸດ "ສເຕີເຊີມ" ຂອງອາເມລິກາໄດ້ເດີນທາງເຂົ້ານ່ານທະເລໝູ່ເກາະຊີ່ຊ່າໃນວັນທີ 2 ກໍລະກົດ ເຊິ່ງຈີນກໍໄດ້ຕອບໂຕ້ດ້ວຍການສົ່ງກຳປັ່ນຮົບແລະຍົນຮົບເພື່ອເຕືອນກຳປັ່ນຮົບຂອງອາເມລິກາ ທັງໄດ້ຂັບໄລ່ໃຫ້ອອກຈາກນ່ານທະເລຈີນ. ການກະທຳຂອງອາເມລິກາຄືດັ່ງກ່າວເປັນການລະເມີດກົດໝາຍຈີນແລະກົດໝາຍສາກົນ ທັງເປັນການລ່ວງລະເມີດອະທິປະໄຕຂອງຈີນຢ່າງເປີດແປນ ແລະເປັນການທ້າທາຍທັງທາງການເມືອງແລະການທະຫານທີ່ໜັກໜ່ວງ. ການກະທຳຢ່າງບັງອາດດັ່ງກ່າວໄດ້ສ້າງຄວາມບໍ່ພໍໃຈໃຫ້ແກ່ຈີນແລະຈີນກໍເດັດດ່ຽວຄັດຄ້ານຕໍ່ການທ້າທາຍດັ່ງກ່າວ.
ທ່ານລູ້ຄ່າງກ່າວຕື່ມວ່າ, ອາເມລິກາຕັ້ງໃຈຫາເລື່ອງຢູ່ທະເລຈີນໃຕ້ ເຊິ່ງເປັນການຝືນຕໍ່ຄວາມປາຖະໜາໃຫ້ມີສະຖຽນລະພາບ, ການຮ່ວມມືແລະການພັດທະນາຮ່ວມກັນກັບປະເທດໃນພາກພື້ນ. ຈາກນີ້ ຈີນຈິ່ງເລັ່ງທວງໃຫ້ອາເມລິກາຢຸດການກະທຳທ້າທາຍໃນລັກສະນະນີ້ທີ່ເປັນການລ່ວງລະເມີດອະທິປະໄຕແລະເປັນການຂົ່ມຂູ່ຕໍ່ຄວາມໝັ້ນຄົງຂອງຈີນຢ່າງຈະແຈ້ງ ແລະຈີນຈະສືບຕໍ່ໃຊ້ມາດຕະການທີ່ຈຳເປັນທຸກຢ່າງ ເພື່ອປົກປ້ອງອະທິປະໄຕແລະຄວາມໝັ້ນຄົງແຫ່ງຊາດ.