ຕອນບ່າຍວັນທີ 3 ກໍລະກົດນີ້, ທ່ານສີຈິ້ນຜີງ ປະທານປະເທດຈີນໄດ້ເດີນທາງເຖິງນະຄອນຫຼວງມົສກູປະເທດຣັດເຊຍດ້ວຍເຮືອບິນພິເສດ, ເພື່ອຢ້ຽມຢາມປະເທດດັ່ງກ່າວທາງລັດຖະກິດ.
ທ່ານສີຈິ້ນຜີງໄດ້ຕາງໜ້າລັດຖະບານແລະປະຊາຊົນຈີນ, ສະແດງຄວາມຢ້ຽມຢາມຖາມຂ່າວຢ່າງຈິງໃຈແລະກ່າວອວຍພອນອັນດີງາມຕໍ່ລັດຖະບານແລະປະຊາຊົນຣັດເຊຍ. ຂະນະດຽວກັນທ່ານສີຈິ້ນຜິງກໍໄດ້ຊີ້ວ່າ, ປັດຈຸບັນ, ການພົວພັນຄູ່ປະສານງານຍຸດທະສາດຮອບດ້ານລະຫວ່າງຈີນແລະຣັດເຊຍພວມຢູ່ລະດັບດີທີ່ສຸດໃນປະຫວັດສາດ. ແນວໃດກໍດີດ້ວຍການຜະເຊີນກັບສະຖານະການສາກົນທີ່ສັບສົນແລະມີການປ່ຽນແປງຫຼາຍ, ຈີນແລະຣັດເຊຍໄດ້ສ້າງສາຍພົວພັນສາກົນແບບໃໝ່ດ້ວຍການຖືເອົາການຮ່ວມມືແບບຕ່າງຝ່າຍຕ່າງມີຜົນປະໂຫຍດເປັນໃຈກາງ, ແລະໄດ້ປະກອບສ່ວນເຂົ້າໃນການຮັກສາສັນຕິພາບແລະສະຖຽນລະພາບຂອງພາກພື້ນກໍຄືຂອງໂລກຢ່າງຫຼວງຫຼາຍ.
ທ່ານສີຈິ້ນຜີງເນັ້ນວ່າ, ພາຍຫຼັງຂ້າພະເຈົ້າດຳລົງຕຳແໜ່ງເປັນປະທານປະເທດຈີນກໍໄດ້ເດີນທາງຢ້ຽມຢາມຣັດເຊຍເປັນຄັ້ງທີ 6 ແລ້ວ, ເຊິ່ງກໍຫວັງວ່າຈະແລກປ່ຽນຄວາມເຫັນກັບທ່ານປູຕິນເພື່ອລົງເລິກແລະຊຸກຍູ້ການຮ່ວມມືໃນຂົງເຂດຕ່າງໆລະຫວ່າງສອງປະເທດແລະແລກປ່ຽນຄວາມເຫັນກ່ຽວກັບບັນຫາພາກພື້ນແລະສາກົນທີ່ສອງຝ່າຍສົນໃຈຮ່ວມກັນ, ຂະນະດຽວກັນນັ້ນກໍຈະໄດ້ພົວພັນແລະແລກປ່ຽນກັບບຸກຄົນໃນຂົງເຂດຕ່າງໆຂອງສອງປະເທດ. ທີ່ສຳຄັນເຊື່ອວ່າການຢ້ຽມຢາມເທື່ອນີ້ຈະຊຸກຍູ້ສາຍພົວພັນຄູ່ປະສານງານຍຸດທະສາດຮອບດ້ານລະຫວ່າງສອງປະເທດໃຫ້ຂະຫຍາຍຕົວກ້າວໜ້າຢ່າງແນ່ນອນຕໍ່ເນື່ອງ.