ການຂ້າມຊາຍແດນຂອງທະຫານອິນເດຍແຕກຕ່າງເມື່ອຄັ້ງເຄີຍເກີດຂຶ້ນໃນອະດີດ

ຕາມຂ່າວCRI: ເມື່ອມໍ່ໆມານີ້, ທົ່ວໂລກຕ່າງກໍສົນໃຈໃນເຫດການທີ່ກອງທະຫານປ້ອງກັນຊາຍແດນອິນເດຍໄດ້ຂ້າມເສັ້ນຊາຍແດນຕອນຊິກກິມຢ່າງຜິດກົດໝາຍແລ້ວເຂົ້າສູ່ດິນແດນຈີນ.

ທ່ານເກິ໋ງສວງ ໂຄສົກກະຊວງການຕ່າງປະເທດຈີນກ່າວໃນພິທີຖະແຫຼງຂ່າວທີ່ຈັດຂຶ້ນໃນວັນທີ 3 ກໍລະກົດນີ້ວ່າ, ເສັ້ນຊາຍແດນຈີນ-ອິນເດຍຕອນຊິກກິມໄດ້ຂີດແບ່ງຕາມ "ສັນຍາຕິເບດ(Xizang)-ອິນເດຍໃນລະຫວ່າງກອງປະຊຸມຈີນ-ອັງກິດ" ເມື່ອປີ 1890 ແລະສອງຝ່າຍໄດ້ຄຸ້ມຄອງຊາຍແດນຕາມສັນຍາສະບັບນີ້ມາໂດຍຕະຫຼອດ. ແຕ່ການທີ່ອິນເດຍໄດ້ສົ່ງກອງກຳລັງປະກອບອາວຸດຂ້າມຊາຍແດນ ເທື່ອນີ້ເປັນການລະເມີດສັນຍາຂີດແບ່ງຊາຍແດນໃນປະຫວັດສາດ ທັງໄດ້ລ່ວງລະເມີດຫຼັກການພື້ນຖານຂອງ "ກົດບັດສະຫະປະຊາຊາດ" ແລະກົດໝາຍສາກົນ. ຈາກນີ້ຈິ່ງບໍ່ຕ້ອງສົງໄສເລີຍວ່າ, ການກະທຳລັກສະນະນີ້ຂອງອິນເດຍໄດ້ຜິດກັບຫຼັກໝັ້ນທີ່ສະເໝີຕົ້ນສະເໝີປາຍຂອງລັດຖະບານປະເທດດັ່ງກ່າວ ແລະເປັນເຫດການທີ່ເປີດແປນທີ່ສຸດ.

ທ່ານເກິ໋ງສວງກ່າວເນັ້ນວ່າ, ຈີນໄດ້ທັກທ້ວງອິນເດຍຢ່າງເຄັ່ງຂຶມມາແລ້ວຫຼາຍເທື່ອ ທັງໄດ້ຮຽກຮ້ອງໃຫ້ອິນເດຍປະຕິບັດຕາມຂໍ້ກຳນົດທີ່ກ່ຽວຂ້ອງກັບສັນຍາຂີດແບ່ງຊາຍແດນ, ເຄົາລົບອະທິປະໄຕຜືນແຜ່ນດິນຂອງຈີນ ແລະຖອນກຳລັງທະຫານທີ່ຂ້າມຊາຍແດນນັ້ນກັບຄືນສູ່ຊາຍແດນຝັ່ງອິນເດຍທັນທີ.