ຕອນຄ່ຳວັນທີ 4 ກໍລະກົດນີ້ ຕາມເວລາທ້ອງຖິ່ນ, ທ່ານສີຈິ້ນຜິງ ປະທານປະເທດຈີນໄດ້ເດີນທາງເຖິງນະຄອນຫຼວງແບກແລງ ປະເທດເຢຍລະມັນ ແລະໄດ້ພົບປະກັບທ່ານນາງແອງເຈີລາ ເມີແຄວ ນາຍົກລັດຖະມົນຕີປະເທດດັ່ງກ່າວ ຢູ່ເຮືອນເກົ່າຂອງທ່ານມາກ ລີເບີມັງ.
ທ່ານສີຈິ້ນຜິງ ກ່າວວ່າ: ນັບແຕ່ການພົບປະກັນລະຫວ່າງສອງຝ່າຍຢູ່ເມືອງຫັງໂຈ່ວ ສປ ຈີນເມື່ອປີ 2016 ເປັນຕົ້ນມາ, ສາຍພົວພັນລະຫວ່າງຈີນ-ເຢຍລະມັນ ໄດ້ຄືບໜ້າຫຼາຍດ້ານທີ່ໜ້າຊື່ນຊົມ. ຂ້າພະເຈົ້າຫວັງວ່າຜ່ານການຢ້ຽມຢາມເທື່ອນີ້ ຈະເປັນການສືບຕໍ່ຊຸກຍູ້ສາຍພົວພັນຄູ່ຍຸດທະສາດຄົບວົງຈອນລະຫວ່າງສອງປະເທດ. ແນວໃດກໍດີ, ຈີນສະແດງຄວາມຊົມເຊີຍທີ່ວິສາຫາະກິດເຢຍລະມັນຕັ້ງໜ້າເຂົ້າຮ່ວມການສ້າງ "ໜຶ່ງແລວທາງໜຶ່ງເສັ້ນທາງ".
ທ່ານສີຈິ້ນຜິງ ຊີ້ໃຫ້ເຫັນວ່າ: ປັດຈຸບັນ, ຂະບວນການເສດຖະກິດໂລກາພິວັດພວມຢູ່ປາກທາງສີ່ແຍກຂອງປະຫວັດສາດ. ແນວໃດກໍດີ, ຈີນແລະເຢຍລະມັນລ້ວນແຕ່ແມ່ນປະເທດໃຫຍ່ທາງການຄ້າ ແລະກໍແມ່ນຜູ້ໄດ້ຮັບຜົນປະໂຫຍດຈາກເສດຖະກິດໂລກາພິວັດ ທັງເປັນຜູ້ສະໜັບສະໜູນ ແລະ ຮັກສາຂະບວນການເສດຖະກິດໂລກາພິວັດ ເຊິ່ງພວກເຮົາຄວນຊຸກຍູ້ຂະບວນການດັ່ງກ່າວໃຫ້ມີຊີວິດຊີວາ, ເປັນແບບກວມລວມ ແລະ ຍືນຍົງຍິ່ງຂຶ້ນ ເພື່ອໃຫ້ທຸກປະເທດໄດ້ຮັບຜົນປະໂຫຍດຮ່ວມກັນ.
ທ່ານນາງ ແອງເຈີລາ ເມີແຄວ ນາຍົກລັດຖະມົນຕີເຢຍລະມັນ ກໍໄດ້ສະແດງຄວາມຍິນດີຕ້ອນຮັບຢ່າງອົບອຸ່ນຕໍ່ທ່ານສີຈິ້ນຜິງ ປະທານປະເທດຈີນທີ່ຢ້ຽມຢາມປະເທດຕົນທາງລັດຖະກິດ ທັງກ່າວວ່າ: ສາຍພົວພັນລະຫວ່າງເຢຍລະມັນ-ຈີນໃນປັດຈຸບັນໄດ້ພັດທະນາເປັນຢ່າງດີ, ການຮ່ວມມືທີ່ແທ້ຈິງໃນຂົງເຂດຕ່າງໆກໍໄດ້ຮັບຜົນຢ່າງຫຼວງຫຼາຍ. ແນວໃດກໍດີ, ເຢຍລະມັນຍິນດີຮ່ວມກັບຈີນ ເພື່ອຊຸກຍູ້ໃຫ້ສາຍພົວພັນລະຫວ່າງເອີຣົບ-ຈີນໄດ້ຮັບການພັດທະນາ. ຂະນະດຽວກັນ, ເຢຍລະມັນໃຫ້ຄວາມສຳຄັນຕໍ່ຈີນທີ່ເສີມຂະຫຍາຍບົດບາດສຳຄັນໃນກິດຈະການສາກົນ, ຊົມເຊີຍທີ່ສະໜັບສະໜູນລັດທິຫຼາຍຝ່າຍ ແລະ ຂອບໃຈທີ່ສະໜັບສະໜູນເຢຍລະມັນເປັນເຈົ້າພາບຈັດກອງປະຊຸມສຸດຍອດກຸ່ມ 20 ປະເທດຢູ່ເມືອງແຮມເບິກ.