ວັນທີ 4 ກໍລະກົດນີ້ ຢູ່ນະຄອນຫຼວງມົສກູປະເທດຣັດເຊຍ, ທ່ານ ສີຈິ້ນຜິງ ປະທານປະເທດຈີນໄດ້ຕ້ອນຮັບການເຂົ້າຢ້ຽມຄຳນັບຂອງທ່ານ ດີມີຕຣີ ເມດເວແດວ໌ ນາຍົກລັດຖະມົນຕີຣັດເຊຍ.
ໂອກາດດັ່ງກ່າວ,ທ່ານ ສີຈິ້ນຜິງ ໄດ້ກ່າວວ່າ: ປັດຈຸບັນ, ເສດຖະກິດຣັດເຊຍໄດ້ພັດທະນາໄປໃນທາງທີ່ດີຢ່າງຕໍ່ເນື່ອງ, ສັງຄົມມີຄວາມສະຫງົບ. ຣັດເຊຍເປັນຄູ່ຮ່ວມທີ່ສຳຄັນຂອງຈີນໃນການຊຸກຍູ້ການສ້າງ "ໜຶ່ງແລວທາງໜຶ່ງເສັ້ນທາງ", ການຮ່ວມມືທີ່ແທ້ຈິງລະຫວ່າງສອງປະເທດມີຄວາມສາມາດບົ່ມຊ້ອນຢ່າງຫຼວງຫຼາຍ ແລະ ອະນາຄົດທີ່ສົດໃສ. ຈີນເດັດດ່ຽວໜຽວແໜ້ນແລະໝັ້ນໃຈຢ່າງເຕັມສ່ວນທີ່ຈະຮ່ວມກັບຣັດເຊຍຮັບມືກັບສິ່ງທ້າທາຍຂອງໂລກ.
ທ່ານ ດີມີຕຣີ ເມດເວແດວ໌ ກ່າວວ່າ: ສາຍພົວພັນລະຫວ່າງຣັດເຊຍ-ຈີນພວມຢູ່ໃນໄລຍະດີທີ່ສຸດໃນປະຫວັດສາດ,ການຮ່ວມມືແບບຄູ່ຮ່ວມປະສານງານຍຸດທະສາດຮອບດ້ານລະຫວ່າງສອງປະເທດສອດຄ່ອງກັບຜົນປະໂຫຍດຂອງປະຊາຊົນສອງປະເທດ ກໍຄືມີຜົນດີຕໍ່ສັນຕິພາບແລະການພັດທະນາຂອງໂລກ. ຣັດເຊຍຍິນດີຮ່ວມກັບຈີນຮັກສາການໄປມາຫາສູ່ກັນລະຫວ່າງການນຳຂັ້ນສູງຢ່າງແໜ້ນແຟ້ນ,ເປີດກວ້າງການຮ່ວມມືໃນຂົງເຂດຕ່າງໆ,ຈັດຕັ້ງປະຕິບັດໂຄງການຮ່ວມມືທີ່ສຳຄັນ ພ້ອມທັງຈະຕັ້ງໜ້າສຸມໃສ່ການຊຸກຍູ້ການຮ່ວມມືແລະການພັດທະນາໃນລະດັບທ້ອງຖິ່ນແລະເພີ່ມທະວີການແລກປ່ຽນດ້ານວັດທະນະທຳລະຫວ່າງສອງປະເທດ.
 |
