ເນື່ອງໃນໂອກາດເດີນທາງຢ້ຽມຢາມເຢຍລະມັນທາງລັດຖະກິດ, ວັນທີ 4 ກໍລະກົດນີ້, ທ່ານສີຈິ້ນຜິງປະທານປະເທດຈີນໄດ້ພິມບົດຄວາມ "ເພື່ອໂລກທີ່ດີງາມກວ່າເກົ່າ" ລົງໃນສື່ມວນຊົນສຳຄັນຕ່າງໆຂອງເຢຍລະມັນ.
ບົດຄວາມຂຽນວ່າ, ການຢ້ຽມຢາມເທື່ອນີ້ພໍດີເປັນໄລຍະທີ່ຈີນເຢຍລະມັນສ້າງສາຍພົວພັນທາງການທູດຄົບຮອບ 45 ປີ ເຊິ່ງຕະຫຼອດໄລຍະດັ່ງກ່າວ ທັງສອງປະເທດໄດ້ຍົກສາຍພົວພັນ ຂຶ້ນເປັນສາຍພົວພັນຄູ່ຍຸດທະສາດຄົບວົງຈອນໃນປີ 2014 ແລະສາຍພົວພັນຈີນເຢຍລະມັນມີຄວາມໝາຍສຳຄັນທາງຍຸດທະສາດນັບມື້ຫຼາຍຂຶ້ນ, ການຮ່ວມມືທີ່ຕິດແທດຕົວຈິງລະຫວ່າງສອງປະເທດໄດ້ຮັບຜົນສຳເລັດຢ່າງຫຼວງຫຼາຍ ແລະການແລກປ່ຽນດ້ານວັດທະນະທຳກໍໄດ້ຮັບການພັດທະນາຢ່າງວ່ອງໄວ.
ປັດຈຸບັນ, ເສດຖະກິດໂລກໄດ້ເຕີບໂຕຢ່າງໜັກແໜ້ນ, ກຸ່ມ 20 ປະເທດຕ້ອງໄດ້ສືບຕໍ່ເສີມຂະຫຍາຍບົດບາດຂອງການເປັນເວທີສຳຄັນສຳລັບປຶກສາການຮ່ວມມືເສດຖະກິດສາກົນ. ການຜັນຂະຫຍາຍຄວາມເປັນເອກະພາບກັນໃນກອງປະຊຸມສຸດຍອດຫາງໂຈວ່ແລະກອງປະຊຸມສຸດຍອດທຸກຄັ້ງຜ່ານມາຂອງກຸ່ມ 20 ປະເທດ ມີຄວາມໝາຍສຳຄັນໃນການນຳພາການພັດທະນາເສດຖະກິດຂອງໂລກ ແລະກໍສອດຄ່ອງກັບຜົນປະໂຫຍດຂອງທຸກໆຝ່າຍ. ຂ້າພະເຈົ້າຫວັງວ່າການຢ້ຽມຢາມຄັ້ງນີ້ສາມາດຊຸກຍູ້ສາຍພົວພັນຄູ່ຍຸດທະສາດຄົບວົງຈອນລະຫວ່າງສອງປະເທດ ແລະຊຸກຍູ້ໃຫ້ກອງປະຊຸມສຸດຍອດແຮມເບີກປະສົບຜົນສຳເລັດ.
 |
