ຜູ້ສື່ຂ່າວລາຍງານຈາກກອງປະຊຸມລັດຖະມົນຕີກະຊວງສຶກສາທິການປະເທດບຣິກສ(ເບຣຊິນ,ຣັດເຊຍ,ອິນເດຍ,ຈີນແລະອາຟຣິກກາໃຕ້)ຄັ້ງທີ5ທີ່ຈັດຂຶ້ນຢູ່ນະຄອນຫຼວງປັກກິ່ງ ສປ ຈີນໃນວັນທີ 5 ກໍລະກົດນີ້ວ່າ: ຫົວໜ້າຄະນະຜູ້ແທນ 5 ປະເທດບຣິກສໄດ້ລົງນາມໃນຖະແຫຼງການການສຶກສາປັກກິ່ງແລະບັນລຸຄວາມເປັນເອກະພາບການຮ່ວມມືໃນຕໍ່ໜ້າ.
ກອງປະຊຸມຄັ້ງນີ້ເນັ້ນຫົວຂໍ້ "ການຮ່ວມມືດ້ານການສຶກສາປະເທດບຣິກສ: ສົ່ງເສີມໃຫ້ ໂດດເດັ່ນແລະຍຸຕິທຳ" ແລະເພື່ອບັນລຸເປົ້າໝາຍດັ່ງກ່າວກໍໄດ້ອອກຖະແຫຼງການການສຶກສາປັກກິ່ງລະບຸວ່າ: ສືບຕໍ່ສະໜັບສະໜູນການຮ່ວມມືກັນຂອງສະມາຊິກ "ມະຫາວິທະຍາໄລເຄືອຂ່າຍປະເທດບຣິກສ",ການຄົ້ນຄວ້າວິທະຍາສາດແລະການປະດິດສ້າງໃໝ່ ພ້ອມທັງສົ່ງເສີມມະຫາວິທະຍາໄລຂອງບັນດາປະເທດບຣິກສເຂົ້າເປັນສະມາຊິກສະຫະພັນມະຫາວິທະຍາໄລປະເທດບຣິກສ.
ທ່ານເສິນປາວເຊິ່ງ ລັດຖະມົນຕີກະຊວງສຶກສາທິການຈີນຢືນຢັນວ່າ ຜົນຂອງການອອກຖະແຫຼງການການສຶກສາປັກກິ່ງດັ່ງກ່າວນີ້ຖືວ່າເປັນການກະກຽມໃຫ້ແກ່ການພົບປະຂອງປະມຸກລັດ 5 ປະເທດບຣິກສທີ່ຈະຈັດຂຶ້ນຢູ່ເມືອງເຊ້ຍເມີນ ສປ ຈີນໃນເດືອນກັນຍາທີ່ຈະມາເຖິງນີ້.
 |
