ໜັງສືພິມ "ຈາກາຕາພົສ" ປະເທດອິນໂດເນເຊຍລາຍງານຫວ່າງມໍ່ໆນີ້ວ່າ, ເພື່ອປັບປຸງຕະຫຼາດອາຊີຕາເວັນອອກສຽງໃຕ້ໃຫ້ດີຂຶ້ນຕື່ມອີກ, ບໍລິສັດ "ອາລີບາບາ" ເຊິ່ງເປັນບໍລິສັດການຄ້າເອເລັກໂຕຣນິກໃຫຍ່ຂອງຈີນພ້ອມເພີ່ມການລົງທຶນ 1 ຕື້ໂດລາຮ່ວມກັບບໍລິສັດ Lazada ເຊິ່ງເປັນບໍລິສັດການຄ້າເອເລັກໂຕຣນິກທີ່ມີຊື່ສຽງໂດຍມີສຳນັກງານໃຫຍ່ຕັ້ງຢູ່ສິງກະໂປ, ເຊິ່ງເມື່ອເຖິງເວລານັ້ນຫຸ້ນສ່ວນຂອງບໍລິສັດ "ອາລີບາບາ" ຈະເພີ່ມຈາກ 51% ເປັນ 83% ດ້ວຍ, ຍອດມູນຄ່າການລົງທຶນ 2 ຕື້ໂດລາສະຫະລັດ.
ທ່ານຈ່າງຢຸງ ຫົວໜ້າເຈົ້າໜ້າທີ່ບໍລິຫານງານຫຼື CEO ຂອງກຸ່ມບໍລິສັດ "ອາລີບາບາ" ກ່າວວ່າ, ລະດັບການພັດທະນາຕະຫຼາດການຄ້າເອເລັກໂຕຣນິກຢູ່ອາຊີຕາເວັນອອກສຽງໃຕ້ຍັງຕ່ຳ, ແຕ່ມີກຳລັງບົ່ມຊ້ອນຫຼາຍ. ເຊິ່ງຕາມການຄາດໝາຍຂອງບໍລິສັດ google ແລະບໍລິສັດ Temasek Holdings, ຮອດປີ 2025 ມູນຄ່າການຄ້າທາງອິນເຕີເນັດຢູ່ເຂດອາຊີຕາເວັນອອກສຽງໃຕ້ຈະເພີ່ມຂຶ້ນເປັນ 200 ຕື້ໂດລາ.
ຂ່າວແຈ້ງວ່າ, ກຸ່ມບໍລິສັດ "ອາລີບາບາ" ໄດ້ກວາດຊື້ແລະເປັນຜູ້ຖືຫຸ້ນໃຫຍ່ທີ່ສຸດຂອງບໍລິສັດ Lazada ເມື່ອປີ 2016, ໂດຍການດຳເນີນທຸລະກິດຕົ້ນຕໍຂອງບໍລິສັດດັ່ງກ່າວຢູ່ປະເທດສິງກະໂປ, ມາເລເຊຍ, ອິນໂດເນເຊຍ, ຟີລິບປີນ, ໄທແລະຫວຽດນາມ.
 |
