ວັນທີ 5 ກໍລະກົດນີ້ ຢູ່ນະຄອນຫຼວງແບກແລັງປະເທດເຢຍລະມັນ, ທ່ານສີຈິ້ນຜິງ ປະທານປະເທດຈີນໄດ້ພົບປະກັບທ່ານແຟຣງ ໂວນເຕີ ສເຕນມີເອີ ປະທານາທິບໍດີເຢຍລະມັນ ໂດຍປະມຸກລັດທັງສອງປະເທດໄດ້ລົງເລິກແລກປ່ຽນຄວາມເຫັນ ແລະ ເປັນເອກະພາບກັນຕໍ່ການເສີມຂະຫຍາຍສາຍພົວພັນໃນໄລຍະຕໍ່ໄປ.
ທ່ານສີຈິ້ນຜິງກ່າວເນັ້ນວ່າ, ປັດຈຸບັນໂລກພວມປ່ຽນແປງຢ່າງສັບສົນແລະສະຫຼັບສັບຊ້ອນ, ດັ່ງນັ້ນ ໃນຖານະເປັນກຸ່ມເສດຖະກິດທີ່ສຳຄັນຂອງໂລກ, ປະເທດການຄ້າໃຫຍ່ແລະປະເທດທີ່ມີອິດທິພົນສຳຄັນໃນແຕ່ລະພາກພື້ນ, ເພີ່ມທະວີການຮ່ວມມືລະຫວ່າງຈີນ-ເຢຍລະມັນຍິ່ງມີຄວາມໝາຍຍຸດທະສາດ. ພວກເຮົາຕ້ອງຍົກສູງຄວາມໄວ້ເນື້ອເຊື່ອໃຈກັນທາງຍຸດທະສາດ, ເຊື່ອມຕໍ່ຍຸດທະສາດການພັດທະນາແບບຄົບວົງຈອນ, ເພີ່ມທະວີການແລກປ່ຽນວັດທະນະທຳ ແລະເພີ່ມທະວີການຮ່ວມມືສາກົນຢ່າງກວ້າງຂວາງ ເພື່ອຊຸກຍູ້ການຮ່ວມມືໃຫ້ກ້າວຂຶ້ນສູ່ລະດັບສູງກວ່າເກົ່າ.
ທ່ານສເຕນມີເອີຍສະແດງຄວາມຍິນດີຕ້ອນຮັບທ່ານສີຈິ້ນຜິງຢ່າງຈິງໃຈທີ່ໄປຢ້ຽມຢາມເຢຍລະມັນໃນຄັ້ງນີ້ ທັງໄດ້ກ່າວວ່າ, ຫຼາຍສິບປີຜ່ານມາ, ສາຍພົວພັນລະຫວ່າງເຢຍລະມັນແລະຈີນມີຄວາມຄືບໜ້າຢ່າງໃຫຍ່ຫຼວງ, ການຮ່ວມມືດ້ວຍນ້ຳໃຈໄມຕີຈິດມິດຕະພາບລະຫວ່າງສອງປະເທດໃນຂົງເຂດຕ່າງໆໄດ້ຮັບຜົນສຳເລັດຢ່າງຫຼວງຫຼາຍແລະໄດ້ປະສານງານກັນຢ່າງແໜ້ນແຟ້ນໃນວຽກງານສາກົນ ແລະເຢຍລະມັນຍິນດີຮ່ວມກັບຈີນ ເພີ່ມທະວີການຮ່ວມມືໃນຂອບຫຼາຍຝ່າຍ ເຊັ່ນ ກຸ່ມ 20 ປະເທດ, ຮ່ວມກັນປົກປັກຮັກສາສັນຕິພາບສາກົນ ແລະຊຸກຍູ້ການພັດທະນາຂອງໂລກ.