ວັນທີ6ກໍລະກົດນີ້, ຢູ່ເມືອງຮາມເບີກປະເທດເຢຍລະມັນ, ທ່ານສີຈິ້ນຜີງ ປະທານປະເທດຈີນໄດ້ຕ້ອນຮັບການເຂົ້າຢ້ຽມຄຳນັບຂອງທ່ານຫຼີຊຽນລູງ ນາຍົກລັດຖະມົນຕີສິງກະໂປ.
ໂອກາດດັ່ງກ່າວ,ທ່ານສີຈິ້ນຜີງກ່າວເນັ້ນວ່າ, ຈີນແລະສິງກະໂປຕ້ອງສືບທອດມູນເຊື້ອທີ່ດີງາມຈາກຜູ້ນຳຮຸ່ນເກົ່າຂອງສອງປະເທດ, ກຳແໜ້ນທິດທາງການພັດທະນາສາຍພົວພັນສອງປະເທດທັງໃນລະດັບຍຸດທະສາດແລະໄລຍະຍາວນານ, ສືບຕໍ່ສ້າງຄວາມເຂົ້າໃຈແລະສະໜັບສະໜູນໃນບັນຫາທີ່ພົວພັນເຖິງຜົນປະໂຫຍດໃຈກາງຂອງກັນແລະກັນລວມທັງບັນຫາສຳຄັນທີ່ສອງຝ່າຍສົນໃຈຮ່ວມກັນ. ຂະນະດຽວກັນກໍຄວນປະດິດສ້າງແນວຄິດການຮ່ວມມືໃໝ່,ລົງເລິກຂຸດຄົ້ນກຳລັງແຮງບົ່ມຊ້ອນໃນການຮ່ວມມື, ຮ່ວມກັນຈັດຕັ້ງປະຕິບັດບົດບັນທຶກຄວາມເຂົ້າໃຈໃນການຊຸກຍູ້ສ້າງ "ໜຶ່ງແລວທາງໜຶ່ງເສັ້ນທາງ", ເພີ່ມທະວີການຮ່ວມມືເຊື່ອມຈອດພື້ນຖານໂຄງລ່າງ, ການຄ້າແລະການລົງທຶນ, ແລະການຮ່ວມມືດ້ານການທະນາຄານ.
ທ່ານສີຈິ້ນຜີງກ່າວຕື່ມວ່າ, ປັດຈຸບັນ,ສິງປະໂປເປັນປະເທດປະສານງານອາຊຽນກັບຈີນ, ແລະປີໜ້າກໍຈະດຳລົງຕຳແໜ່ງເປັນປະເທດປະທານໝູນວຽນ ອາຊຽນ, ເຊິ່ງຈີນສະໜັບສະໜູນວຽກງານຂອງສິງກະໂປຢ່າງເຕັມທີ່, ທັງເຊື່ອໝັ້ນວ່າສິງກະໂປຈະຊຸກຍູ້ອາຊຽນຮ່ວມກັບຈີນ ຍົກລະດັບການຮ່ວມມືຕົວຈິງລະຫວ່າງສອງຝ່າຍ, ຮ່ວມກັນນຳໜ້າຊຸກຍູ້ການເຊື່ອມໂຍງເຂົ້າກັນໃນພາກພື້ນ, ແລະສ້າງປະຊາຄົມຮ່ວມຊະຕາກຳຈີນ-ອາຊຽນໃຫ້ໜັກແໜ້ນກວ່າເກົ່າ.
ທ່ານຫຼີຊຽນລູງກ່າວວ່າ, ໜຶ່ງປີຜ່ານມາ, ສາຍພົວພັນສິງກະໂປ-ຈີນໄດ້ຮັບຜົນງານໃໝ່. ຈາກສະພາບສາກົນທີ່ຫັນປ່ຽນສະຫຼັບສັບຊ້ອນນັ້ນ,ການລົງເລິກການແລກປ່ຽນແລະການຮ່ວມມືມີຄວາມໝາຍສຳຄັນທີ່ສຸດ. ທັງນີ້ສິງກະໂປຈະສືບຕໍ່ສະໜັບສະໜູນແລະຕັ້ງໜ້າເຂົ້າຮ່ວມການສ້າງ "ໜຶ່ງແລວທາງໜຶ່ງເສັ້ນທາງ", ຈັດຕັ້ງປະຕິບັດໂຄງການສຳຄັນລະຫວ່າງລັດຖະບານໃຫ້ດີ, ເປີດກວ້າງການຮ່ວມມືໃນຂົງເຂດການທະນາຄານ,ລົດໄຟຄວາມໄວສູງ,ເຂດການຄ້າເສລີແລະອື່ນໆກັບຈີນ. ແລະຍິນດີຕັ້ງໜ້າຊຸກຍູ້ສາຍພົວພັນຄູ່ຮ່ວມມືຈີນ-ອາຊຽນໃຫ້ແຂງແຮງກວ່າເກົ່າ.