ກອງປະຊຸມສຸດຍອດກຸ່ມ 20 ປະເທດຄັ້ງທີ 12 ໄດ້ໄຂຂຶ້ນຢູ່ເມືອງທ່າແຮມເບິກ ທາງພາກເໜືອເຢຍລະມັນໃນວັນທີ 7 ກໍລະກົດນີ້ ແລະ ຈະດຳເນີນເປັນເວລາ 2 ວັນ. ຂະນະທີ່ໃນເງື່ອນໄຂຂອງເສດຖະກິດໂລກມີສັນຍານອັນຕັ້ງໜ້າ ແຕ່ກໍມີຄວາມສ່ຽງນັ້ນ, ກອງປະຊຸມສຸດຍອດຄັ້ງນີ້ອາດຈະສືບຕໍ່ແລະລົງເລິກປະຕິບັດຕາມຄວາມເປັນເອກະພາບກັນລະຫວ່າງບັນດາຝ່າຍໃນກອງປະຊຸມສຸດຍອດທີ່ຈັດຂຶ້ນຢູ່ເມືອງຫັງໂຈ່ວ ສປ ຈີນໃນປີຜ່ານມາ ພ້ອມທັງພະຍາຍາມບັນລຸຂໍ້ຕົກລົງ ເພື່ອຮັບມືກັບບັນດາສິ່ງທ້າທາຍຮ່ວມຫຼາຍກວ່າເກົ່າອີກ ເປັນຕົ້ນ ລັດທິປົກປ້ອງການຄ້າ, ການປ່ຽນແປງດິນຟ້າອາກາດ ແລະອື່ນໆ ເພື່ອບັນລຸການເຕີບໂຕຕໍ່ເນື່ອງທີ່ດຸນດ່ຽງ, ຕ່າງຝ່າຍຕ່າງມີຜົນປະໂຫຍດ ແລະ ກວມລວມກວ່າເກົ່າ.
ທ່ານສີຈິ້ນຜິງ ປະທານປະເທດຈີນກໍໄດ້ເຂົ້າຮ່ວມກອງປະຊຸມ. ຂະນະທີ່ໃນວັນທີ 6 ທ່ານໄດ້ກ່າວຢູ່ເມືອງແຮມເບິກວ່າ: ພວກເຮົາສະໜັບສະໜູນເຢຍລະມັນຈັດກອງປະຊຸມສຸດຍອດແຮມເບິກ ແລະຫວັງວ່າໂດຍຢູ່ບົນພື້ນຖານຂອງກອງປະຊຸມສຸດຍອດເມືອງຫັງໂຈ່ວ ປີຜ່ານມາ ກອງປະຊຸມສຸດຍອດຄັ້ງນີ້ຈະໄດ້ຮັບຜົນຢ່າງຫຼວງຫຼາຍເຊັ່ນດຽວກັນ ແລະເປັນການສົ່ງສັນຍານທີ່ຕັ້ງໜ້າຕໍ່ພາຍນອກກ່ຽວກັບການເປີດປະຕູແລະຮ່ວມມື.
ເມື່ອທຽບໃສ່ປີຜ່ານມາ, ເສດຖະກິດໂລກໄດ້ມີສັນຍານອັນຕັ້ງໜ້າ ແລະທ່າອ່ຽງການພັດທະນາກໍໄດ້ຮັບການປັບປຸງດີຂຶ້ນ ເຊິ່ງເປັນການສ້າງເງື່ອນໄຂທີ່ດີໃຫ້ແກ່ບັນດາທ່ານຜູ້ນຳ ໄດ້ປຶກສາຫາລືແຜນການໃຫຍ່ໃນການພັດທະນາແບບກວມລວມແລະຕໍ່ເນື່ອງໃນກອງປະຊຸມສຸດຍອດເມືອງແຮມເບິກ. ແນວໃດກໍດີ ໃນປັດຈຸບັນ, ເສດຖະກິດໂລກຍັງປະເຊີນສິ່ງທ້າທາຍອັນຂ້ຽວຂາດຫຼາຍຢ່າງ ລວມທັງກະແສຕໍ່ຕ້ານຂະບວນການໂລກາພິວັດ, ລັດທິປົກປ້ອງການຄ້າ, ຄວາມສ່ຽງທີ່ເກີດຂຶ້ນກັບຄວາມໝັ້ນທ່ຽງດ້ານການທະນາຄານ, ການປ່ຽນແປງດິນຟ້າອາກາດ, ວິກິດການຈາກຊາວອົບພະຍົບ, ລັດທິກໍ່ການຮ້າຍ ແລະອື່ນໆ. ເພື່ອຮ່ວມມືກັນຮັບມືກັບສິ່ງທ້າທາຍໃນລັກສະນະທົ່ວໂລກເຫຼົ່ານີ້, ບັນດາທ່ານຜູ້ນຳຈະຕ້ອງເພີ່ມທະວີການປະສານງານໃນກອງປະຊຸມສຸດຍອດເມືອງແຮມເບິກ ເໝືອນດັ່ງການກ່າວຂອງທ່ານນາງແອງເຈີລາ ເມີແຄວ ນາຍົກລັດຖະມົນຕີເຢຍລະມັນທີ່ວ່າ "ພວກເຮົາຕ້ອງການເລັ່ງໃຫ້ກຸ່ມ 20 ປະເທດແຂງແຮງກວ່າທຸກເວລາຜ່ານມາ".
ເລີ່ມແຕ່ເຂົ້າຮັບໜ້າທີ່ເປັນປະເທດປະທານໝູນວຽນກຸ່ມ 20 ປະເທດປະຈຳປີ 2017 ເມື່ອເດືອນທັນວາປີ 2016, ເຢຍລະມັນກໍໄດ້ກຳຈົດຈຸດສຳຄັນຂອງກອງປະຊຸມສຸດຍອດແຮມເບິກໃນເບື້ອງຕົ້ນ ລວມທັງ 3 ເປົ້າໝາຍໃຈກາງ ຄື ຮັບປະກັນຄວາມໝັ້ນທ່ຽງ, ຍົກຂີດຄວາມສາມາດໃນອະນາຄົດ ແລະແບກຫາບຄວາມຮັບຜິດຊອບ.
ຂະນະທີ່ຫົວຂໍ້ກອງປະຊຸມສຸດຍອດແຮມເບິກ ຄື "ສ້າງໂລກເຊື່ອມຕໍ່ກັນ"(Shape an interconnected world) ໄດ້ສ່ອງແສງໃຫ້ເຫັນເຖິງຫຼັກໝັ້ນຂອງເຢຍລະມັນທີ່ຊຸກຍູ້ຂະບວນການໂລກາພິວັດ. ຂະນະທີ່ເມື່ອບໍ່ດົນມານີ້, ປະມຸກລັດບັນດາປະເທດເອີຣົບກໍໄດ້ກ່າວຢ້ຳຕໍ່ການສະໜັບສະໜູນການຄ້າເສລີ, ແຕ່ຈຸດຢືນຂອງລັດຖະບານອາເມລິກາໃນກອງປະຊຸມສຸດຍອດແຮມເບິກນັ້ນ, ວົງການຕ່າງໆ ພັດບໍ່ເຫັນແງ່ດີໃດໆ ດັ່ງທ່ານນາງແອງເຈີລາ ເມີແຄວ ນາຍົກລັດຖະມົນຕີເຢຍລະມັນ ໄດ້ກ່າວວ່າ: ເອີຣົບແລະອາເມລິກາມີຄວາມຂັດແຍ້ງກັນຢ່າງຈະແຈ້ງ, ການປຶກສາຫາລືບັນຫາຕ່າງໆໃນກອງປະຊຸມສຸດຍອດແຮມເບິກຈະປະສົບຄວາມຫຍຸ້ງຍາກຢ່າງແນ່ນອນ.
ສ່ວນບັນຫາການປ່ຽນແປງດິນຟ້າອາກາດກໍໄດ້ຮັບຄວາມສົນໃຈເຊັ່ນດຽວກັນ ຫຼັງລັດຖະບານອາເມລິກາປະກາດຖອນອອກຈາກ "ສັນຍາປາຣີ" ທີ່ເປັນສັນຍາເພື່ອຮັບມືກັບການປ່ຽນແປງດິນຟ້າອາກາດຂອງອົງການສະຫະປະຊາຊາດ ໃນເດືອນຜ່ານມາ. ທ່ານນາງເມີແຄວ ກ່າວວ່າ: ບັນດາປະເທດເອີຣົບມີຈຸດຢືນທີ່ເປັນເອກະພາບກັນໃນການຊຸກຍູ້ "ສັນຍາປາຣີ" ທັງມີທ່າທີເດັດດ່ຽວກວ່າເວລາໃດໝົດ. ກ່ອນໜ້ານີ້, ລັດຖະບານເຢຍລະມັນກໍໄດ້ຖະແຫຼງວ່າ ທ່ານນາງເມີແຄວ ນາຍົກລັດຖະມົນຕີປະເທດຕົນຈະພົບປະກັບທ່ານໂດນັນ ທຣຳ ປະທານາທິບໍດີອາເມລິກາ, ແຕ່ເມື່ອພິຈາລະນາທ່າທີຂອງທ່ານໂດນັນ ທຣຳແລ້ວ, ທ່ານນາງເມີແຄວ ກໍກ່າວວ່າ: ບໍ່ຮັບປະກັນວ່າການພົບປະສອງຝ່າຍເທື່ອນີ້ຈະສາມາດແກ້ໄຂຄວາມເຫັນຂັດແຍ້ງກັນລະຫວ່າງເຢຍລະມັນ-ອາເມລິກາທີ່ເກີດຂຶ້ນມາໄດ້ຫຼືບໍ່ ແລະການປຶກສາຫາລືກັນລະຫວ່າງບັນດາຝ່າຍໃນກອງປະຊຸມສຸດຍອດຄັ້ງນີ້ຈະເຕັມໄປດ້ວຍຄວາມຫຍຸ້ງຍາກຕ່າງໆນານາ.
ທ່ານຈູ່ກວ່າງຢ້າວ ຮອງລັດຖະມົນຕີກະຊວງການເງິນຈີນ ກ່າວວ່າ: ກອງປະຊຸມສຸດຍອດແຮມເບິກໄດ້ວາງ 3 ຫົວຂໍ້ສຳຄັນດ້ານການເງິນ ແລະ ການທະນາຄານ ເປັນຕົ້ນ ຫຼັກການເພີ່ມທະວີຄວາມໝັ້ນໜຽວທົນທານຂອງເສດຖະກິດ, ສົ່ງເສີມການລົງທຶນ ໂດຍສະເພາະການລົງທຶນຢູ່ອາຟຣິກາ ແລະຊຸກຍູ້ການພັດທະນາເສດຖະກິດດີຈີຕອນ ເຊິ່ງເປັນການສືບຕໍ່ຫົວຂໍ້ຂອງກອງປະຊຸມສຸດຍອດຫັງໂຈ່ວ ໂດຍຈີນສະແດງຄວາມຊົມເຊີຍເປັນຢ່າງສູງ ທັງ ສະໜັບສະໜູນ 3 ຫົວຂໍ້ດັ່ງກ່າວ ຢ່າງເຕັມປ່ຽມ.
