ວັນທີ 7 ກໍລະກົດນີ້, ທ່ານສີຈີ້ນຜີງ ປະທານປະເທດຈີນໄດ້ພົບປະກັບທ່ານນາງເທເຣຊາ ເມ ນາຍົກລັດຖະມົນຕີອັງກິດຢູ່ເມືອງແຮມເບີກປະເທດເຢຍລະມັນ.
ທ່ານສີຈີ້ນຜີງຊີ້ວ່າ, 'ການພົບປະສອງຝ່າຍໃນໄລຍະກອງປະຊຸມສຸດຍອດ G20 ເມືອງຫັງໂຈ່ວເດືອນກັນຍາປີຜ່ານມາ, ໄດ້ຢືນຢັນທິດທາງຫຼັກຢູ່ໃນຍຸກສະໄໝຄຳຂອງການພົວພັນຈີນ-ອັງກິດ' ແລະ ຈາກຄວາມພະຍາຍາມຮ່ວມຂອງສອງຝ່າຍ, ຄວາມໄວ້ເນື້ອເຊື່ອໃຈກັນດ້ານຍຸດທະສາດລະຫວ່າງຈີນ-ອັງກິດໄດ້ເຂົ້າສູ່ລວງເລິກ, ການຮ່ວມມືທີ່ແທ້ຈິງໃນຂົງເຂດຕ່າງໆກໍກ້າວຂຶ້ນສູ່ລະດັບສູງ.ຂະນະທີ່ປີນີ້ແມ່ນຈີນ ກັບ ອັງກິດສ້າງສາຍພົວພັນທາງການທູດຄົບຮອບ 45 ປີ, ການພົວພັນລະຫວ່າງສອງຝ່າຍຜະເຊີນກັບໂອກາດພັດທະນາໃໝ່. ແນວໃດກໍ່ດີ ຈີນຍິນດີຮ່ວມມືກັບອັງກິດ, ຊຸກຍູ້ການພົວພັນຄູ່ຮ່ວມຍຸດທະສາດຮອບດ້ານທົ່ວໂລກທີ່ຫັນໜ້າສູ່ສັດຕະວັດທີ 21 ລະຫວ່າງສອງປະເທດໃຫ້ຂະຫຍາຍຕົວຂຶ້ນສູ່ລະດັບໃໝ່, ເພື່ອສ້າງຄວາມຜາສຸກໃຫ້ແກ່ປະຊາຊົນສອງປະເທດຫຼາຍຍິ່ງຂຶ້ນ.
ທ່ານນາງເທເຣຊາ ເມກ່າວວ່າ, ອັງກິດສຸມກຳລັງຊຸກຍູ້ການພົວພັນຄູ່ຮ່ວມຍຸດທະສາດຮອບດ້ານທົ່ວໂລກທີ່ຫັນໜ້າໄປສູ່ສັດຕະວັດ 21 ລະຫວ່າງສອງປະເທດ, ຍຶດໝັ້ນທິດທາງ 'ຍຸກສະໄໝຄຳ' ຂອງການພົວພັນລະຫວ່າງສອງປະເທດ. ນອກນີ້,ອັງກິດໃຫ້ຄວາມສຳຄັນຕໍ່ບົດບາດອັນສຳຄັນຂອງຈີນໃນວຽກງານສາກົນ, ຂະນະທີ່ສອງຝ່າຍກໍມີຜົນປະໂຫຍດຮ່ວມໃນຫຼາຍຂົງເຂດ.ແນວໃດກໍ່ດີ ອັງກິດຍິນດີນຳໃຊ້ກົນໄກສົນທະນາລະຫວ່າງເຈົ້າໜ້າທີ່ຂັ້ນສູງຂອງສອງປະເທດຢ່າງເຕັມທີ່, ເພີ່ມທະວີການແລກປ່ຽນ ແລະ ການຮ່ວມມືກັບຈີນໃນດ້ານການຄ້າ, ການລົງທຶນ, ວັດທະນະທຳ ແລະ ຄວາມໝັ້ນຄົງ, ແລກປ່ຽນ ແລະ ປະສານງານກັບຈີນຢ່າງແໜ້ນແຟ້ນໃນບັນຫາຈຸດຮ້ອນສາກົນ ແລະ ພາກພື້ນ. ນອກນີ້,ອັງກິດຍິນດີຕັ້ງໜ້າເຂົ້າຮ່ວມການຮ່ວມມືໃນຂົງເຂດການເງິນເປັນຕົ້ນ ໃນຂອບ 'ໜຶ່ງແລວທາງໜຶ່ງເສັ້ນທາງ'.
