ພາຍຫຼັງດຳເນີນມາເປັນເວລາ 2 ວັນ, ກອງປະຊຸມສຸດຍອດກຸ່ມ 20 ປະເທດຫຼື G20 ຄັ້ງທີ 12 ທີ່ຈັດຂຶ້ນຢູ່ເມືອງແຮມເບີກປະເທດເຢຍລະມັນກໍໄດ້ອັດລົງໃນວັນທີ 8 ກໍລະກົດນີ້ຕາມເວລາທ້ອງຖິ່ນ. ໃນກອງປະຊຸມສຸດຍອດດັ່ງກ່າວ, ທ່ານສີຈິ້ນຜິງ ປະທານປະເທດຈີນໄດ້ເຂົ້າຮ່ວມແລະກ່າວປາໄສໃນຫົວຂໍ້ສຳຄັນຄື"ຍຶດໝັ້ນການເປີດປະຕູແລະກວມລວມ,ສົ່ງເສີມການເຕີບໂຕທີ່ມີບົດບາດຊຸກຍູ້ກັນ". ກ່ອນໜ້ານີ້, ທ່ານສີຈິ້ນຜິງໄດ້ຢ້ຽມຢາມເຢຍລະມັນທາງລັດຖະກິດແຕ່ວັນທີ 4 ຫາວັນທີ 6 ກໍລະກົດນີ້ ໂດຍໃນໄລຍະຢ້ຽມຢາມ,ທ່ານໄດ້ພິມບົດຄວາມທີ່ມີຫົວຂໍ້"ເພື່ອໂລກທີ່ດີງາມກວ່າເກົ່າ"ລົງໃນສື່ສຳຄັນຂອງເຢຍລະມັນ. ຂະນະທີ່ຊ່ຽວຊານແລະນັກວິຊາການເຢຍລະມັນໄດ້ຕີລາຄາສູງຕໍ່ການຢ້ຽມຢາມເຢຍລະມັນຂອງທ່ານສີຈິ້ນຜິງພ້ອມທັງທ່າທີຂອງຈີນໃນກອງປະຊຸມສຸດຍອດ G20.
ທ່ານດຣ ມີເຊວ ບອສມັນ ອະດີດຫົວໜ້າກົມວຽກງານເອີຣົບແລະສາກົນລັດເຮເຊນຂອງເຢຍລະມັນກ່າວວ່າ: ປັດຈຸບັນ,ການຂະຫຍາຍຕົວຂອງການພົວພັນລະຫວ່າງເຢຍລະມັນ-ຈີນມີພະລັງຊີວິດຫຼາຍ ເຊິ່ງການຢ້ຽມຢາມຂອງທ່ານປະທານສີຈິ້ນຜິງໃນຄັ້ງນີ້ສະແດງໃຫ້ເຫັນວ່າການພົວພັນລະຫວ່າງສອງປະເທດກຳລັງຢູ່ໃນລະດັບດີທີ່ສຸດໃນປະຫວັດສາດ. ທີ່ສຳຄັນ, ການຢ້ຽມຢາມທາງລັດຖະກິດຂອງທ່ານສີຈິ້ນຜິງຍັງໄດ້ສ້າງພື້ນຖານໃຫ້ແກ່ກອງປະຊຸມສຸດຍອດ G20 ຕື່ມອີກ.
ທ່ານເຊວ ໂຊເມີ ຜູ້ຜະລິດໜັງສືພິມ"ເດຍເຊດ"ເຢຍລະມັນ ທັງເປັນຊ່ຽວຊານບັນຫາການພົວພັນລະຫວ່າງປະເທດກ່າວວ່າ: ຄຳປາໄສຂອງທ່ານປະທານສີຈິ້ນຜິງໄດ້ສະແດງໃຫ້ເຫັນວ່າ ຈີນແລະເຢຍລະມັນມີຫຼັກໝັ້ນທີ່ເປັນເອກະພາບກັນໃນຫຼາຍຫົວຂໍ້ສຳຄັນ.
ທ່ານໂຈອາຊິມ ເບສ ຊ່ຽວຊານບັນຫາອາຊີສູນຄົ້ນຄວ້າໂລກແລະພາກພື້ນຂອງເຢຍລະມັນກໍເຫັນວ່າ: ທ່າທີຂອງທ່ານສີຈິ້ນຜິງໃນກອງປະຊຸມສຸດຍອດ G20 ໄດ້ສະແດງໃຫ້ເຫັນວ່າ ຈີນເປັນປະເທດໃຫຍ່ທີ່ສຳຄັນໃນການສະໜັບສະໜູນການເຄົາລົບ"ສັນຍາປາຣີ"ແລະການຄ້າເສລີຂອງໂລກ.