ທ່ານຣີເຊັບ ໄຕຢິບ ເອີໂດກັນ ປະທານາທິບໍດີຕວກກີຢືນຢັນໃນວັນທີ 9 ກໍລະກົດນີ້ວ່າ: ຕົນຈະເດີນທາງຢ້ຽມຢາມກາຕາ, ກູເວດ ແລະ ຊາອູດິ ອາຣາບີ ເພື່ອເຮັດໃຫ້ກາຕາແລະປະເທດທີ່ກ່ຽວຂ້ອງແກ້ໄຂວິກິດການທາງການທູດໂດຍການເຈລະຈາກັນ.
ທ່ານເອີໂດກັນ ກ່າວວ່າ: ຕົນໄດ້ພົບປະກັບຜູ້ນຳອາເມລິກາ, ຣັດເຊຍ ແລະປະເທດອື່ນໆ ຂະນະທີ່ເຂົ້າຮ່ວມກອງປະຊຸມສຸດຍອດຜູ້ນຳກຸ່ມ 20 ປະເທດເມືອງແຮມເບິກ ໂດຍໄດ້ເນັ້ນຫຼາຍເທື່ອເຖິງຄວາມຈຳເປັນທີ່ຈະແກ້ໄຂວິກິດການທາງການທູດລະຫວ່າງກາຕາແລະຊາອູດິ ອາຣາບີເປັນຕົ້ນໂດຍການເຈລະຈາກັນ. ແນວໃດກໍດີ, ຕົກກີກໍສະໜັບສະໜູນກູເວດທີ່ພະຍາຍາມໄກ່ເກ່ຍເພື່ອແກ້ໄຂວິກິດການດັ່ງກ່າວ.
ຂ່າວລາຍງານຕື່ມວ່າ: ຕວກກີສະໜັບສະໜູນກາຕາມາໂດຍຕະຫຼອດໃນວິກິດການດັ່ງກ່າວ ທັງສະໜອງອາຫານໃຫ້ເປັນຈຳນວນຫຼາຍ.