ທ່ານຮາຍເດີ ອານ ອາບາດີ ນາຍົກລັດຖະມົນຕີ ທັງເປັນຜູ້ບັນຊາການກອງກຳລັງປະກອບອາວຸດອີຣັກ ໄດ້ເຂົ້າຮ່ວມກອງປະຊຸມຢູ່ເມືອງໂມຊຸນໃນວັນທີ 9 ກໍລະກົດນີ້ ແລະໄດ້ອອກຄຳສັ່ງຫຼາຍຢ່າງ ທັງຮຽກຮ້ອງໃຫ້ກອງທັບລັດຖະບານສຸມກຳລັງຮັກສາໝາກຜົນແຫ່ງໄຊຊະນະດ້ວຍເພີ່ມຄວາມເຂັ້ມແຂງໃນການປະຕິບັດໜ້າທີ່ຕ່າງໆ ເປັນຕົ້ນ ດັບສູນກຳລັງກຸ່ມ IS ທີ່ຫຼົງເຫຼືອ, ຟື້ນຟູຄວາມໝັ້ນຄົງ ແລະ ຄວາມສະຫງົບໃນເມືອງໂມຊຸນ, ກູ້ມິນ ແລະ ລະເບີດຕ່າງໆ ພ້ອມທັງປົກປັກຮັກສາປະຊາຊົນ ແລະວຽກອື່ນໆໃຫ້ດີ.
ໃນວັນດັ່ງກ່າວ, ຫ້ອງການນາຍົກລັດຖະມົນຕີອີຣັກ ໄດ້ອອກຖະແຫຼງການວ່າ: ທ່ານອາບາດີ ຜູ້ບັນຊາການກອງກຳລັງປະກອບອາວຸດປະເທດຕົນໄດ້ເດີນທາງເຖິງເມືອງໂມຊຸນຫຼັງໄດ້ຮັບການປົດປ່ອຍແລ້ວ ທັງສະແດງຄວາມຊົມເຊີຍຕໍ່ນາຍແລະພົນທະຫານກໍຄືປະຊາຊົນອີຣັກທີ່ກ້າຫານຕໍ່ສູ້ຈົນໄດ້ຮັບໄຊຊະນະທີ່ຍິ່ງໃຫຍ່.
ຫຼັງເສຍການຄວບຄຸມເມືອງໂມຊຸນແລ້ວ, ກຸ່ມ IS ທີ່ຄວບຄຸມພື້ນທີ່ໃນອີຣັກຍັງເຫຼືອພຽງແຕ່ບໍ່ເທົ່າໃດເມືອງແລ້ວ ເຊິ່ງຖືວ່າຫຼຸດລົງເກືອບ 90% ເມື່ອທຽບໃສ່ປີ 2014. ນັກວິເຄາະຊີ້ວ່າ: ກຸ່ມ IS ປະສົບຄວາມພ່າຍແພ້ຢ່າງໜັກໜ່ວງຢູ່ອີຣັກໂດຍບໍ່ສາມາດຕ່າວປິ້ນຄືນໄດ້ອີກແລ້ວ.
