ທ່ານນາງແອງເຈີລາ ເມີເຄວ ນາຍົກລັດຖະມົນຕີເຢຍລະມັນກ່າວຢູ່ເມືອງແຮມເບີກເມື່ອມໍ່ໆມານີ້ວ່າ, ອາຣັບບີຊາອຸດິດຈະເປັນເຈົ້າພາບຈັດກອງປະຊຸມສຸດຍອດຜູ້ນຳກຸ່ມ 20 ປະເທດໃນປີ 2020. ຂະນະທີ່ປີໜ້າຈະຈັດຂຶ້ນຢູ່ອາກຊັງຕິນ ແລະຢູ່ຍີ່ປຸ່ນໃນປີ 2019.
ທ່ານອິບຣາຮິມ ອານ-ອາຊາຟ ລັດຖະມົນຕີກະຊວງພາຍໃນອາຣັບບີຊາອຸດິດກ່າວໃນພິທີປິດປະຊຸມສຸດຍອດແຮມເບີກກຸ່ມ 20 ປະເທດວ່າ, ອາຣັບບີຊາອຸດິດຈະຮ່ວມມືກັບປະເທດໃນກຸ່ມ 20 ປະເທດຢ່າງສຸດຂີດ ທັງມີຄວາມໝັ້ນໃຈແລະຄວາມສາມາດໃນການຈັດກອງປະຊຸມສຳເລັດຜົນຕາມເປົ້າໝາຍ.
ທ່ານອານ-ອາຊາຟກ່າວວ່າ, ອາຣັບບີຊາອຸດິດສະແດງຄວາມຊົມເຊີຍຕໍ່ຜົນສຳເລັດຈັດກອງປະຊຸມຂອງເຢຍລະມັນ ແລະຮຽກຮ້ອງໃຫ້ບັນດາປະເທດທີ່ເຂົ້າຮ່ວມກອງປະຊຸມນຳໄປຈັດຕັ້ງຜັນຂະຫຍາຍ "ວາລະການພັດທະນາແບບຍືນຍົງ 2030 ຂອງອົງການສະຫະປະຊາຊາດ" ເພື່ອຮັບມືກັບສິ່ງທ້າທາຍນາໆປະການ ທັງຊ່ວຍປະເທດພວມພັດທະນາແລະປະເທດດ້ອຍພັດທະນາທີ່ສຸດ ເຊິ່ງກວມເອົາທັງປະເທດອາຟຣິກາເພື່ອບັນລຸເປົ້າໝາຍພັດທະນາແບບຍືນຍົງ ແລະຮັບປະກັນວຽກງານທີ່ກ່ຽວຂ້ອງໃຫ້ໄດ້ຮັບການປະຕິບັດຢ່າງມີປະສິດທິພາບ.
 |
