ງານວາງສະແດງສິນຄ້າຈີນ-ອາຊຽນຄັ້ງທີ 14 ທີ່ຈະຈັດຂຶ້ນຢູ່ນະຄອນນານນິງເຂດກວາງຊີ ສປ ຈີນແຕ່ວັນທີ 12 ຫາ 15 ກັນຍາປີນີ້. ຈະຕັ້ງເຂດວາງສະແດງ "ໜຶ່ງແລວທາງໜຶ່ງເສັ້ນທາງ" ເປັນຄັ້ງທຳອິດ, ແລະປັດຈຸບັນມີວິສາຫະກິດຈາກ 10 ກວ່າປະເທດເຊັ່ນຍີ່ປຸ່ນ, ສ ເກົາຫຼີ ອາເມລິກາ ອົສຕຼາລີແລະອື່ນໆເຊິ່ງເປັນປະເທດລົງນາມໃນສັນຍາການພົວພັນຄູ່ເສດຖະກິດຮອບດ້ານໃນພາກພື້ນ ຫຼື RCEP ແລະປະເທດສຳຄັນທີ່ລຽບຕາມ "ໜຶ່ງແລວທາງໜຶ່ງເສັ້ນທາງ" ແຈ້ງເຈດນຳນົງເຂົ້າຮ່ວມແລ້ວ.
ທ່ານສຽນເຄີ້ມິງ ຮອງລັດຖະມົນຕີກະຊວງການຄ້າຈີນກ່າວໃນພິທີຖະແຫຼງຂ່າວທີ່ຈັດຂຶ້ນໃນວັນທີ 10 ກໍລະກົດນີ້ວ່າ, ງານວາງສະແດງຄັ້ງນີ້ໄດ້ເນັ້ນ "ຮ່ວມກັນສ້າງເສັ້ນທາງສາຍໄໝທາງທະເລສະຕະວັດທີ 21, ຊຸກຍູ້ໃຫ້ເສດຖະກິດພາກພື້ນເຊື່ອມໂຍງເຂົ້າກັນດ້ວຍການທ່ອງທ່ຽວ", ຂະນະທີ່ບຣູໄນແມ່ນປະເທດກິຕິມະສັກ. ຈີນພ້ອມເພີ່ມການປະສານສົມທົບກັບບັນດາປະເທດອາຊຽນ, ປະຕິບັດຄວາມເປັນເອກະພາບຕ່າງໆລະຫວ່າງຜູ້ນຳສອງຝ່າຍໃຫ້ດີ, ໂດຍສະເພາະປະຕິບັດໝາກຜົນທີ່ໄດ້ຮັບໃນກອງປະຊຸມສຸດຍອດເວທີປຶກສາຫາລືການຮ່ວມມືສາກົນ "ໜຶ່ງແລວທາງໜຶ່ງເສັ້ນທາງ" ທີ່ຈັດຂຶ້ນໃນເດືອນພຶດສະພາປີນີ້, ເພື່ອຊຸກຍູ້ໃຫ້ການຮ່ວມມືມິດຕະພາບລະຫວ່າງສອງຝ່າຍກ້າວໄປຂ້າງໜ້າຢ່າງບໍ່ຢຸດຢັ້ງ.