ທ່ານເຊີເກ ລາຟຣົຟ ລັດຖະມົນຕີກະຊວງການຕ່າງປະເທດຣັດເຊຍກ່າວໃນວັນທີ 10 ກໍລະກົດນີ້ວ່າ, ຣັດເຊຍ, ອາເມລິກາແລະຊອກດານີພວມກໍ່ສ້າງສູນຕິດຕາມການຢຸດຍິງຢູ່ພາກຕາເວັນຕົກສຽງໃຕ້ຊີຣີ ເພື່ອຕິດຕາມສະພາບການປະຕິບັດສັນຍາຢຸດຍິງຢູ່ເຂດດັ່ງກ່າວ.
ພາຍຫຼັງຣັດເຊຍ, ອາເມລິກາ ແລະຊອກດານີໄດ້ເປັນເອກະພາບກັນສະໜັບສະໜູນສັນຍາຢຸດຍິງຢູ່ພາກຕາເວັນຕົກສຽງໃຕ້ຂອງຊີຣີຢູ່ອຳມານໃນວັນທີ 7 ກໍລະກົດນີ້. ໂຄສົກລັດຖະບານຊອກດານີກໍໄດ້ອອກມາເປີດເຜີຍໃນມື້ດຽວກັນວ່າ, 3 ຝ່າຍເປັນເອກະພາບກັນສະໜັບສະໜູນການຢຸດຍິງ ເພື່ອເຮັດໃຫ້ການປະທະກັນຢູ່ພາກໃຕ້ຊີຣີຫຼຸດຜ່ອນລົງ ແລະກ້າວໄປສູ່ການເປັນປໍລະປັກກັນຢຸດຕິ ລວມທັງເປັນການຟື້ນຟູສະຖຽນລະພາບ ແລະອຳນວຍຄວາມສະດວກໃຫ້ແກ່ການຊ່ວຍເຫຼືອດ້ານມະນຸດສະທຳຢູ່ເຂດດັ່ງກ່າວຕື່ມອີກ. ສັນຍາຢຸດຍິງມີຜົນບັງຄັບໃຊ້ແຕ່ເວລາ 12 ໂມງຂອງວັນທີ 9 ກໍລະກົດຕາມເວລາທ້ອງຖິ່ນເປັນຕົ້ນໄປ ແລະການທີ່ບັນດາຝ່າຍໄດ້ຕົກລົງກັນສ້າງສູນຕິດຕາມການຢຸດຍິງພາກຕາເວັນຕົກສຽງໃຕ້ຊີຣີຢູ່ນະຄອນຫຼວງອຳມານປະເທດຊອກດານີ ກໍເພື່ອເຮັດໃຫ້ການຕິດຕໍ່ພົວພັນກັບຜູ້ແທນຝ່າຍຄ້ານແລະທະຫານລັດຖະບານຊີຣີໄດ້ໂດຍກົງ. ຂ່າວແຈ້ງວ່າ, ມາເຖິງຕອນຄ່ຳວັນທີ 9 ກໍລະກົດນີ້, ການປະທະກັນແບບຮຸນແຮງຢູ່ເຂດຢຸດຍິງໄດ້ຢຸດຕິລົງແລ້ວ.