ຕາມຂ່າວສານຈີນ: ທ່ານ ນາຈິບ ຕຸນ ຣາຊັກ ນາຍົກລັດຖະມົນຕີມາເລເຊຍ ກ່າວຢູ່ນະຄອນຫຼວງກົວລາລຳເປີໃນວັນທີ 10 ກໍລະກົດນີ້ວ່າ, ພາຍຫຼັງບໍລິສັດການບິນມາເລເຊຍສຸມໃສ່ການປັບປຸງໃນ 5 ປີຜ່ານມານັ້ນ, ມາຮອດປັດຈຸບັນບັນ ຖືວ່າສຳເລັດໂດຍດີ ແລະຄາດວ່າ ປີໜ້າບໍລິສັດດັ່ງກ່າວຈະໄດ້ຮັບຜົນກຳໄລ.
ທ່ານ ນາຈິບ ກ່າວໃນໂອກາດເຂົ້າຮ່ວມງານລ້ຽງເພື່ອສິ້ນສຸດການຖືສິນອົດຂອງກຸ່ມບໍລິສັດການບິນມາເລເຊຍໃນມື້ດັ່ງກ່າວວ່າ: "ເປັນສັນຍານທີ່ດີທີ່ CEO ຂອງບໍລິສັດການບິນມາເລເຊຍບອກຂ້າພະເຈົ້າວ່າ, ປີໜ້າ ບໍລິສັດອາດຈະໄດ້ຮັບຜົນກຳໄລ." ແລະບໍລິສັດດັ່ງກ່າວ ກໍຈະພະຍາຍາມໃຫ້ໄດ້ຮັບການເປັນບໍລິສັດການບິນ 5 ດາວຄືນໃໝ່.
ທ່ານ ນາຈິບ ກ່າວຕື່ມວ່າ, ແຜນການປັບປຸງບໍລິສັດດັ່ງກ່າວຄືນໃໝ່ ໄດ້ເຂົ້າສູ່ໄລຍະສອງແລ້ວ ເຊິ່ງກໍເປັນໄລຍະເປີດເສັ້ນທາງການບິນໃໝ່, ຂະນະທີ່ປັດຈຸບັນ ໄດ້ເປີດເສັ້ນທາງການບິນໃໝ່ສູ່ຈີນ 11 ສາຍແລ້ວ.
ປີ 2014 ບໍລິສັດການບິນມາເລເຊຍປະສົບອຸບັດເຫດການບິນ 2 ເທື່ອ ແລະຫຼັງຈາກນັ້ນ ຈຶ່ງໄດ້ປັບປຸງຄືນໃໝ່ຢ່າງຂະໜາດໃຫຍ່ ທັງໄດ້ຫຼຸດພະນັກງານ 1 ສ່ວນ 3 ຫຼືເກືອບ 6000 ຄົນໃນປີ 2015.