ສື່ມວນຊົນຕວກກີລາຍງານໃນວັນທີ 12 ກໍລະກົດນີ້ວ່າ: ນັບແຕ່ເກີດການລັດຖະປະຫານແຕ່ປະສົບຄວາມຫຼົ້ມເຫຼວເມື່ອປີ 2016 ເປັນຕົ້ນມາ, ປະເທດຕົນມີທະຫານ 7.600 ກວ່າຄົນຖືກຖອນຍົດແລະຕຳແໜ່ງເນື່ອງຈາກຖືກສົງໄສເຂົ້າຮ່ວມ "ຂະບວນການກູເລນ".
ທັງນີ້, ຂ່າວສານອານາໂດລູ ປະເທດຕວກກີ ໄດ້ອ້າງຕາມແຫຼ່ງຂ່າວຈາກກະຊວງປ້ອງກັນປະເທດໂດຍລາຍງານວ່າ: ມີທະຫານ 7.655 ຄົນຖືກຖອນຍົດແລະຕຳແໜ່ງ ໃນນີ້ລະດັບນາຍພົນ 150 ຄົນ, ຂະນະທີ່ທະຫານອີກ 786 ຄົນຖືກໂຈະການປະຕິບັດໜ້າທີ່ຊົ່ວຄາວ.
ຂ່າວລາຍງານຕື່ມວ່າ: ຜົນຂອງການປາບປາມໃນທົ່ວປະເທດຕວກກີ ມາຮອດປັດຈຸບັນເຮັດໃຫ້ 1 ແສນ 1 ໝື່ນຄົນຖືກໄລ່ອອກຈາກງານ ເຊິ່ງໃນຈຳນວນນີ້ສ່ວນຫຼາຍມາຈາກທະຫານ, ຕຳຫຼວດ, ຕຸລາການ, ຂ່າວລັບ, ອົງການລັດ ແລະ ໂຮງຮຽນ. ຂະນະທີ່ປັດຈຸບັນ ກໍຍັງສືບຕໍ່ຂະບວນການກວດກາແລະປາບປາມຜູ້ທີ່ພົວພັນກັບເຫດການລັດຖະປະຫານ.