ຕາມຂ່າວCRI: ຂ່າວແຈ້ງວ່າ: ທ່ານ ໄຈຊານຄາ ເລຂາປະຈຳວຽກງານການຕ່າງປະເທດ,ອະດີດເອກອັກຄະລັດຖະທູດອິນເດຍປະຈຳຈີນໄດ້ສະແດງທ່າທີຄັ້ງທຳອິດຕໍ່ການປະເຊີນໜ້າກັນລະຫວ່າງກອງທັບຈີນ-ອິນເດຍຄັ້ງນີ້ຂະນະທີ່ປາຖະກະຖາຢູ່ສິງກະໂປ ແລະກ່າວວ່າຈະບໍ່ອະນຸຍາດໃຫ້ຄວາມຂັດແຍ້ງກັນຢູ່ເຂດຊາຍແດນສົ່ງຜົນຮ້າຍແບບຍາວນານ.
ໃນການຖະແຫຼງຂ່າວທີ່ຈັດຂຶ້ນໃນວັນທີ 12 ກໍລະກົດນີ້, ທ່ານ ເກີງສວງ ໂຄສົກກະຊວງການຕ່າງປະເທດຈີນກ່າວວ່າ: ອິນເດຍໄດ້ຂ້າມເສັ້ນຊາຍແດນຕອນຊິກຄິມທີ່ໄດ້ຮັບການຮັບຮອງຈາກສອງຝ່າຍຢ່າງຜິດກົດໝາຍແລະເຂົ້າປະເທດຈີນຄັ້ງນີ້ ມີຄວາມແຕກຕ່າງກັນດ້ານທາດແທ້ກັບຄວາມຂັດແຍ້ງກັນທີ່ເກີດຂຶ້ນຢູ່ເຂດຊາຍແດນທີ່ບໍ່ໄດ້ຮັບການກຳນົດລະຫວ່າງກອງປ້ອງກັນຊາຍແດນລະຫວ່າງສອງຝ່າຍໃນເມື່ອກ່ອນ. ປັດຈຸບັນ, ເຂດຊາຍແດນຕອນຊິກຄີມແມ່ນເຂດຊາຍແດນທີ່ໄດ້ຂີດແບ່ງໄວ້ພຽງຕອນດຽວລະຫວ່າງຈີນ-ອິນເດຍ ໂດຍເມື່ອປີ 1890, "ສັນຍາຕິເບດ-ອິນເດຍໃນກອງປະຊຸມຈີນ-ອັງກິດ"ໄດ້ຂີດແບ່ງເຂດຊາຍແດນດັ່ງກ່າວຢ່າງເປັນທາງການ ເຊິ່ງລັດຖະບານສອງປະເທດລ້ວນແຕ່ໄດ້ຮັບຮອງແລະນຳໃຊ້ສັນຍາ. ສັນຍາດັ່ງກ່າວມີຜົນບັງຄັບໃຊ້ໄດ້,ມີຜົນສັກສິດທາງກົດໝາຍທັງຕໍ່ຈີນແລະອິນເດຍ. ຈີນຮຽກຮ້ອງອີກເທື່ອໜຶ່ງໃຫ້ອິນເດຍຖອນກຳລັງທະຫານປ້ອງກັນຊາຍແດນທີ່ຂ້າມແດນນັ້ນກັບຄືນທັນທີໂດຍບໍ່ມີເງື່ອນໄຂ ແລະໃຫ້ແກ້ໄຂຄວາມຂັດແຍ້ງກັນຄັ້ງນີ້ຢ່າງເໝາະສົມໂດຍໄວ.