ວັນທີ 19 ກໍລະກົດນີ້, ຈີນ ແລະ ອາເມລິກາຈະຈັດກອງປະຊຸມສົນທະນາເສດຖະກິດຢ່າງຮອບດ້ານຮອບທຳອິດຢູ່ນະຄອນຫຼວງວໍຊິງຕັນ. ຂະນະທີ່ໃນພິທີຖະແຫຼງຂ່າວຂອງກະຊວງການຄ້າຈີນໃນວັນທີ 13 ກໍລະກົດນີ້, ທ່ານກາວເຟິງ ໂຄສົກກະຊວງການຄ້າ ກ່າວວ່າ: ຈີນ ແລະ ອາເມລິກາ ຈະສະຫຼຸບໝາກຜົນການຈັດຕັ້ງປະຕິບັດ "ແຜນການຮ້ອຍວັນ" ການຮ່ວມມືດ້ານເສດຖະກິດລະຫວ່າງສອງປະເທດ ພ້ອມທັງປຶກສາຫາລືແຜນການໜຶ່ງປີການຮ່ວມມືດ້ານເສດຖະກິດລະຫວ່າງສອງຝ່າຍ. ນອກນີ້, ສອງຝ່າຍຍັງຈະສົນທະນາກັນກ່ຽວກັບການເພີ່ມທະວີການປະສານງານດ້ານນະໂຍບາຍເສດຖະກິດມະຫາພາກ, ເສດຖະກິດໂລກແລະການຄຸ້ມຄອງ ລວມທັງການຄ້າແລະການລົງທຶນທີ່ສອງຝ່າຍສົນໃຈຮ່ວມກັນ ເພື່ອເພີ່ມທະວີການຮ່ວມມືດ້ານເສດຖະກິດການຄ້າລະຫວ່າງສອງຝ່າຍ.
"ແຜນການຮ້ອຍວັນ" ແມ່ນແຜນການຮ່ວມມືທີ່ສອງຝ່າຍຕົກລົງກັນໃນຂະນະທີ່ການພົບປະກັນລະຫວ່າງປະມຸກລັດສອງປະເທດຢູ່ສວນນິຄົມໃຫຍ່ມາອາລາໂກ ປະເທດອາເມລິກາ ໃນເດືອນເມສາປີນີ້ ໂດຍລວມມີ 3 ປະເພດ ຄື ໜຶ່ງ, ຜົນໄດ້ຮັບໃນໄລຍະຕົ້ນ; ສອງ, ຂົງເຂດທີ່ສາມາດຍາດເອົາຜົນສຳເລັດໄດ້ຢ່າງໃຫຍ່ຫຼວງພາຍໃນ 100 ວັນ ຫຼັງສອງຝ່າຍພະຍາຍາມຮ່ວມກັນ ແລະ ສາມ, ຜົນງານແຕ່ລະໄລຍະທີ່ໄດ້ຮັບພາຍໃນ 100 ວັນ ຫຼັງສອງຝ່າຍສຸມທຸກຄວາມພະຍາຍາມຮ່ວມກັນ.