ວັນທີ 13 ກໍລະກົດນີ້, ອັງກິດໄດ້ປະກາດຍັດຕິກົດໝາຍທີ່ສຳຄັນສະບັບໜຶ່ງ ທີ່ມີຊື່ວ່າ "ຍັດຕິກົດໝາຍຍົກເລີກໃຫຍ່" ເພື່ອຫັນປ່ຽນກົດໝາຍສະຫະພາບເອີຣົບທີ່ປະຕິບັດໃນປັດຈຸບັນໃຫ້ເປັນກົດໝາຍພາຍໃນປະເທດຕົນ ແລະເປັນການກະກຽມດ້ານກົດໝາຍຫຼັງອັງກິດຖອນອອກຈາກສະຫະພາບເອີຣົບ.
ຍັດຕິກົດໝາຍດັ່ງກ່າວຍັງຈະຍົກເລີກ "ກົດໝາຍປະຊາຄົມເອີຣົບ" ທີ່ລັດຖະສະພາອັງກິດສ້າງເມື່ອປີ 1972 ເພື່ອກະກຽມໃຫ້ແກ່ການເຂົ້າເປັນສະມາຊິກສະຫະພາບເອີຣົບໃນປີ 1973 ເຊິ່ງກົດໝາຍດັ່ງກ່າວໄດ້ລະບຸຫຼັກການຕ່າງໆ ເປັນຕົ້ນ ກົດໝາຍສະຫະພາບເອີຣົບສາມາດນຳໃຊ້ໂດຍກົງ ຫຼື ນຳໃຊ້ທາງອ້ອມຢູ່ອັງກິດ ແລະ ໃນກໍລະນີທີ່ກົດໝາຍອັງກິດຂັດກັບກົດໝາຍສະຫະພາບເອີຣົບນັ້ນ ຈະນຳໃຊ້ກົດໝາຍສະຫະພາບເອີຣົບເປັນບຸລິມະສິດແທນ.
ຫາງສຽງທ້ອງຖິ່ນວິຈານວ່າ: "ຍັດຕິກົດໝາຍຍົກເລີກໃຫຍ່" ເປັນໜຶ່ງໃນຍັດຕິກົດໝາຍຕ່າງໆທີ່ສຳຄັນທີ່ສຸດໃນປະຫວັດສາດປະເທດຕົນ ເຊິ່ງຈະກຽມຄວາມພ້ອມເພື່ອອັງກິດຖອນອອກຈາກສະຫະພາບເອີຣົບ ແລະ ຖອນຄືນອະທິປະໄຕການນິຕິບັນຍັດຂອງລັດຖະສະພາປະເທດຕົນ. ເຖິງຢ່າງໃດກໍຕາມ, "ຍັດຕິກົດໝາຍຍົກເລີກໃຫຍ່" ໃນຄັ້ງນີ້ຍັງຕ້ອງໄດ້ຜ່ານການໃຫ້ສັດຕະຍາບັນຂອງລັດຖະສະພາອັງກິດກ່ອນ ຈຶ່ງຈະກາຍເປັນກົດໝາຍທີ່ສົມບູນໄດ້ໃນທີ່ສຸດ.
