ທ່ານເກິ໋ງສວງ ໂຄສົກກະຊວງການຕ່າງປະເທດຈີນໄດ້ຕອບຄຳຖາມຂອງນັກຂ່າວກ່ຽວກັບການອອກຖະແຫຼງການຂອງກະຊວງການຕ່າງປະເທດຟີລິບປິນ ໃນພິທີຖະແຫຼງຂ່າວທີ່ຈັດຂຶ້ນໃນວັນທີ 13 ກໍລະກົດນີ້ວ່າ, ຈີນຍິນດີສືບຕໍ່ຮ່ວມກັບຟີລິບປິນແກ້ໄຂບັນຫາທີ່ກ່ຽວຂ້ອງກັບທະເລຈີນໃຕ້ຢ່າງເໝາະສົມ ດ້ວຍການສົນທະນາ ຢ່າງມີໄມຕີຈິດມິດຕະພາບແລະເຂົ້າອົກເຂົ້າໃຈເຊິ່ງກັນແລະກັນ.
ທ່ານເກິ໋ງສວງກ່າວວ່າ, ໜຶ່ງປີກວ່າມານີ້, ສາຍພົວພັນຈີນຟີລິບປິນໄດ້ຟື້ນຟູເປັນປົກກະຕິເທື່ອລະກ້າວ, ສອງຝ່າຍໄດ້ກັບຄືນສູ່ຄວາມຖືກຕ້ອງ ໂດຍຜ່ານການປຶກສາຫາລືກັນເພື່ອແກ້ໄຂບັນຫາ. ພາຍໃຕ້ຄວາມພະຍາຍາມຮ່ວມຂອງຈີນແລະບັນດາປະເທດໃນອາຊຽນ ເຊິ່ງລວມທັງຟີລິບປິນ, ສະຖານະການທະເລຈີນໃຕ້ໄດ້ຜ່ອນຄາຍລົງ ແລະໄດ້ເປັນເອກະພາບກັນກ່ຽວກັບຂອບ "ກົດແຫ່ງການປະພຶດໃນທະເລຈີນໃຕ້".
ທ່ານເກິ໋ງສວງກ່າວວ່າ, ຈີນມີຈຸດຢືນຂອງຕົນທີ່ໜັກແໜ້ນມາໂດຍຕະຫຼອດ ທີ່ຈະປຶກສາຫາລືກັບປະເທດທີ່ກ່ຽວຂ້ອງໂດຍກົງ ເຊິ່ງລວມທັງຟີລິບປິນ ເພື່ອແກ້ໄຂຄວາມຂັດແຍ້ງກັນໂດຍສັນຕິ, ພະຍາຍາມຮ່ວມກັບປະເທດໃນອາຊຽນ ເພື່ອປົກປັກຮັກສາສັນຕິພາບແລະສະຖຽນລະພາບຂອງທະເລຈີນໃຕ້. ຈີນຍິນດີສືບຕໍ່ປຶກສາຫາລືກັບຟີລິບປິນ ເພື່ອແກ້ໄຂບັນຫາທະເລຈີນໃຕ້ຢ່າງເໝະສົມ ແລະສ້າງບັນຍາກາດອັນດີງາມ ເພື່ອຊຸກຍູ້ສາຍພົວພັນແລະການຮ່ວມມືລະຫວ່າງຈີນກັບຟີລິບປິນໃຫ້ດີຂຶ້ນເປັນກ້າວໆ.