ທ່ານນາຟີສ໌ ຊາກາເຣຍ ໂຄສົກກະຊວງການຕ່າງປະເທດປາກິສະຖານເປີດເຜີຍໃນວັນທີ 13 ກໍລະກົດນີ້ວ່າ, ນັບແຕ່ຕົ້ນປີນີ້ມາ, ທະຫານອິນເດຍໄດ້ສ້າງບັນຫາຢູ່ໃກ້ເສັ້ນຄວບຄຸມຕົວຈິງກັສເມຍເລື້ອຍໆ. ມາຮອດປັດຈຸບັນ, ອິນເດຍໄດ້ລະເມີດສັນຍາຢຸດຍິງສອງຝ່າຍ 542 ເທື່ອ.
ທ່ານຊາກາເຣຍໄດ້ກ່າວໃນພິທີຖະແຫຼງຂ່າວທີ່ຈັດຂຶ້ນໃນມື້ດຽວກັນວ່າ, ປາກິສະຖານບໍ່ມີເຈດຕະນາເຮັດໃຫ້ສະຖານະການລະຫວ່າງສອງປະເທດເຄັ່ງຕຶງຂຶ້ນ ແລະໄດ້ພະຍາຍາມສຸດຂີດເພື່ອຮັກສາຄວາມອົດກັ້ນໄວ້. ໃນເຫດຍິງປະທະກັນໃນວັນທີ 8 ກໍລະກົດນີ້, ປາກິສະຖານມີແຕ່ຕອບໂຕ້ການຍິງປືນ "ໂດຍບໍ່ມີເຫດຜົນ" ຂອງອິນເດຍເທົ່ານັ້ນ.
ສື່ມວນຊົນປາກິສະຖານລາຍງານວ່າ, ວັນທີ 8 ກໍລະກົດນີ້, ທະຫານອິນເດຍໄດ້ຍິງປືນ "ໂດຍບໍ່ມີເຫດຜົນ" ໃສ່ເບື້ອງປາກິສະຖານຢູ່ໃກ້ເສັ້ນຄວບຄຸມຕົວຈິງກັສເມຍ ແລະເຮັດໃຫ້ປະຊາຊົນປາກິສະຖານເສຍຊີວິດ 5 ຄົນ. ຫຼັງຈາກນັ້ນ, ທະຫານປາກິສະຖານໄດ້ຍິງຕອບໂຕ້ຄືນ ແລະສົ່ງຜົນເຮັດໃຫ້ທະຫານອິນເດຍເສຍຊີວິດແລະບາດເຈັບຈຳນວນໜຶ່ງ.