ຕາມຂ່າວສານຈີນ: ທ່ານ ໂຈໂຄ ວິໂດໂດ ປະທານາທິບໍດີອິນໂດເນເຊຍ ໄດ້ອອກລັດຖະດຳລັດເລກທີ 2 ຂອງປີ 2017 ກ່ຽວກັບການຄຸ້ມຄອງອົງການຈັດຕັ້ງສັງຄົມ ເພື່ອເຂົ້າມາແທນລັດຖະດຳລັດທີ່ປະກາດໃຊ້ໃນປີ 2013. ອີງຕາມລັດຖະດຳລັດອົງການຈັດຕັ້ງສັງຄົມເລກທີ 13 ຂອງປີ 2013, ການຍຸບອົງການຈັດຕັ້ງສັງຄົມກຸ່ມໜຶ່ງ ຕ້ອງຜ່ານຂັ້ນຕອນຕ່າງໆເຊັ່ນ: ເກ່ຍກ່ອມ 3 ເທື່ອ, ຕັກເຕືອນເປັນລາຍລັກອັກສອນ ແລະຢຸດຕິກິດຈະກຳຊົ່ວຄາວເປັນຕົ້ນ. ຖ້າບໍ່ມີຜົນບັງຄັບໃຊ້ ກໍຕ້ອງຜ່ານການອະນຸມັດຈາກສານ, ແລະລັດຖະບານຈຶ່ງສາມາດຍຸບໄດ້.
ອີງຕາມລັດຖະດຳລັດໃໝ່, ໃນຕໍ່ໜ້າ, ກະຊວງຍຸດຕິທຳແລະສິດທິມະນຸດອິນໂດເນເຊຍ ຈະມີສິດຍຸບອົງການຈັດຕັ້ງຫົວຮຸນແຮງຂອງປະຊາຊົນທີ່ລະເມີດຫຼັກການຂອງການສະຖາປະນາປະເທດແລະລັດຖະທຳມະນູນ. ທ່ານ ວີຣານໂຕ ລັດຖະມົນຕີກະຊວງການເມືອງ, ກົດໝາຍແລະຄວາມໝັ້ນຄົງອິນໂດເນເຊຍ ໄດ້ອະທິບາຍລັດຖະດຳລັດດັ່ງກ່າວໃນການຖະແຫຼງໃນຂ່າວວັນທີ 12 ກໍລະກົດນີ້ວ່າ, ດຳລັດສະບັບໃໝ່ນີ້ຈະກາຍເປັນກົດໝາຍຂອງຊາດຫຼັງການປຶກສາຫາລືແລະຜ່ານຈາກສະພາແຫ່ງຊາດ.
ວັນທີ 8 ພຶດສະພາຜ່ານມາ, ລັດຖະບານອິນໂດເນເຊຍ ໄດ້ປະກາດຍຸບແນວໂຮມປົດປ່ອຍອິສລາມ ຫຼື HTI ໂດຍກ່າວວ່າ, ການເຄື່ອນໄຫວຂອງກຸ່ມດັ່ງກ່າວໄດ້ຂົ່ມຂູ່ຄວາມໝັ້ນຄົງແລະສະຖຽນລະພາບຂອງຊາດແລ້ວ.