ອົງການທ່ອງທ່ຽວແຫ່ງຊາດຈີນ ໄດ້ຈັດງານໂຄສະນາໃນຫົວຂໍ້ "ຈີນທີ່ສວຍງາມ" ຢູ່ນະຄອນຫຼວງພະນົມເປັນປະເທດກຳປູເຈຍໃນວັນທີ 12 ກໍລະກົດນີ້ ເພື່ອແນະນຳຊັບພະຍາກອນແລະຜະລິດຕະພັນການທ່ອງທ່ຽວຂອງຈີນສູ່ລັດຖະບານ, ອົງການທ່ອງທ່ຽວ ແລະປະຊາຊົນກຳປູເຈຍ. ງານໂຄສະນາດັ່ງກ່າວໄດ້ດຶງດູດຕົວແທນຈາກບໍລິສັດທ່ອງທ່ຽວ, ບໍລິສັດການບິນ ແລະສື່ມວນຊົນຮ້ອຍກວ່າແຫ່ງຂອງກຳປູເຈຍເຂົ້າຮ່ວມ. ໃນງານຄັ້ງນີ້, ຜູ້ປະກອບການທ່ອງທ່ຽວຈາກ 10 ແຂວງ, ກຳແພງນະຄອນແລະເຂດປົກຄອງຕົນເອງຂອງຈີນ ໄດ້ແນະນຳເອກະລັກດ້ານການທ່ອງທ່ຽວຂອງທ້ອງຖິ່ນຕົນ.
ທ່ານ ທອງຄົນ ລັດຖະມົນຕີກະຊວງທ່ອງທ່ຽວກຳປູເຈຍກ່າວວ່າ, ກຳປູເຈຍແລະອາຊຽນ ຖືເອົາຈີນເປັນຄູ່ຮ່ວມມືຍຸດທະສາດແລະເປັນຕະຫຼາດທີ່ສຳຄັນທີ່ສຸດ, ອະນາຄົດຂອງຂະແໜງການທ່ອງທ່ຽວກຳປູເຈຍ ບໍ່ສາມາດແຍກອອກຈາກນັກທ່ອງທ່ຽວແລະນັກລົງທຶນຂອງຈີນໄດ້ຢ່າງເດັດຂາດ.
ທ່ານ ທັນສິງເຊິ່ງ ອຸປະທູດຊົ່ວຄາວຂອງຈີນປະຈຳກຳປູເຈຍກ່າວວ່າ, ປີນີ້ແມ່ນປີຮ່ວມມືທ່ອງທ່ຽວຈີນ-ອາຊຽນ, ຫວັງວ່າ ງານໂຄສະນາຄັ້ງນີ້ ຈະສາມາດເຮັດໃຫ້ປະຊາຊົນກຳປູເຈຍຊອກຮູ້ຈີນຫຼາຍກວ່າເກົ່າ, ຂຸດຄົ້ນຄວາມສາມາດບົ່ມຊ້ອນໃນການລົງທຶນແລະການຮ່ວມມືດ້ານການທ່ອງທ່ຽວລະຫວ່າງສອງປະເທດ ເພື່ອປະກອບສ່ວນເຂົ້າໃນການຊຸກຍູ້ການພັດທະນາສາຍພົວພັນອາຊຽນ-ຈີນ.