ທ່ານ ເກີງສວງ ໂຄສົກກະຊວງການຕ່າງປະເທດຈີນ ກ່າວໃນກອງປະຊຸມຂ່າວທີ່ຈັດຂຶ້ນຢູ່ນະຄອນຫຼວງປັກກິ່ງເມື່ອວັນທີ 13 ກໍລະກົດນີ້ວ່າ, ການຂວ້ຳບາດສປປເກົາຫຼີຂອງສະພາຄວາມໝັ້ນຄົງ ບໍແມ່ນການຂວ້ຳບາດທາງເສດຖະກິດຮອບດ້ານ, ການທີ່ຈີນແລະສປປເກົາຫຼີຮັກສາການຄ້າທີ່ເປັນປົກກະຕິນັ້ນ ບໍ່ໄດ້ລະເມີດມະຕິຂອງສະພາຄວາມໝັ້ນຄົງ.
ກົມໃຫຍ່ດ່ານພາສີຈີນໄດ້ເປີດເຜີຍຂໍ້ມູນໃນຕອນເຊົ້າມື້ດຽວກັນວ່າ, ມູນຄ່ານຳເຂົ້າສິນຄ້າຈາກສປປເກົາຫຼີຂອງຈີນໃນ 6 ເດືອນຕົ້ນປີນີ້ ບັນລຸ 2 ຕື້ 550 ລ້ານໂດລາສະຫະລັດ, ເພີ່ມຂຶ້ນ 10,5% ເມື່ອທຽບໃສ່ໄລຍະດຽວກັນຂອງປີຜ່ານມາ. ໃນເວລາຕອບຄຳຖາມທີ່ກ່ຽວຂ້ອງ, ທ່ານ ເກີງສວງ ກ່າວວ່າ, ຈີນແລະສປປເກົາຫຼີເປັນປະເທດໃກ້ຄຽງ, ແລະໄດ້ຮັກສາການພົວພັນດ້ານການຄ້າທີ່ເປັນປົກກະຕິນຳກັນມາໂດຍຕະຫຼອດ. ມະຕິເລກທີ 2321 ຂອງສະພາຄວາມໝັ້ນຄົງລະບຸວ່າ, ຖ້າຫາກວ່າສປປເກົາຫຼີສົ່ງອອກເຫຼັກກ້າແລະຫີນເຫຼັກເພື່ອຈຸດປະສົງໃນການດຳລົງຊີວິດຂອງປະຊາຊົນ ແລະບໍ່ກ່ຽວພັນເຖິງການສ້າງຜົນກຳໄລໃຫ້ແກ່ແຜນການນິວເຄລຍແລະຂີປະນາວຸດແລ້ວ, ຈະບໍ່ຖືກຂວ້ຳບາດ. ສະນັ້ນ, ຈີນຮັກສາການພົວພັນດ້ານການຄ້າທີ່ເປັນປົກກະຕິກັບສປປເກົາຫຼີນັ້ນ ບໍ່ໄດ້ລະເມີດມະຕິຂອງສະພາຄວາມໝັ້ນຄົງແຕ່ຢ່າງໃດ.