ກອງປະຊຸມສຳມະນາ "ການສ້າງຕັ້ງອາຊຽນຄົບຮອບ 50 ປີແລະສາຍພົວພັນຈີນ-ອາຊຽນ"ໂດຍຄະນະການທູດຈີນປະຈຳອາຊຽນແລະສູນຄົ້ນຄວ້າອາຊຽນມະຫາວິທະຍາໄລອິນໂດເນເຊຍຮ່ວມກັນເປັນເຈົ້າພາບໄດ້ໄຂຂຶ້ນຢູ່ນະຄອນຫຼວງຈາກາຕາປະເທດອິນໂດເນເຊຍໃນວັນທີ 14 ກໍລະກົດນີ້.
ທ່ານສູປູ້ ເອກອັກຄະລັດຖະທູດຈີນປະຈຳອາຊຽນໄດ້ປາໄສໃນພິທີເປີດກອງປະຊຸມສຳມະນາດັ່ງກ່າວໂດຍເນັ້ນວ່າ ນັບແຕ່ຈີນ-ອາຊຽນສ້າງຕັ້ງສາຍພົວພັນຄູ່ເຈລະຈາເມື່ອປີ 1991 ເປັນຕົ້ນມາ, ສາຍພົວພັນທາງການເມືອງລະຫວ່າງສອງຝ່າຍໄດ້ເພີ່ມທະວີຂຶ້ນຢ່າງຕໍ່ເນື່ອງ, ການຮ່ວມມືດ້ານເສດຖະກິດການຄ້າພັດທະນາແບບກ້າວກະໂດດ, ການແລກປ່ຽນດ້ານວັດທະນະທຳແໜ້ນແຟ້ນຍິ່ງຂຶ້ນ ແລະການຮ່ວມມືໃນຂົງເຂດຕ່າງໆກໍປະສົບຜົນສຳເລັດຢ່າງໃຫຍ່ຫຼວງ. ສາຍພົວພັນຈີນ-ອາຊຽນໄດ້ກາຍເປັນສາຍພົວພັນທີ່ເຂັ້ມແຂງແລະຂະຫຍາຍຕົວໄວກວ່າໝູ່ໃນສາຍພົວພັນລະຫວ່າງອາຊຽນກັບບັນດາຄູ່ເຈລະຈາ. ປີໜ້າຈະເປັນປີຄົບຮອບ 15 ປີແຫ່ງການສ້າງສາຍພົວພັນຄູ່ຮ່ວມຍຸດທະສາດຈີນ-ອາຊຽນ, ຖືວ່າ ສາຍພົວພັນລະຫວ່າງສອງຝ່າຍໄດ້ຢູ່ຈຸດສຳຄັນໃນປະຫວັດສາດທີ່ສືບທອດວຽກງານອັນເກົ່າແລະພັດທະນາວຽກງານອັນໃໝ່.
ໃນໄລຍະດຳເນີນກອງປະຊຸມ, ຝ່າຍຕ່າງໆທີ່ຮ່ວມປະຊຸມໄດ້ຕັ້ງໜ້າຕີລາຄາຜົນສຳເລັດຂອງການເສີມຂະຫຍາຍສາຍພົວພັນຈີນ-ອາຊຽນໂດຍເປັນເອກະພາບກັນວ່າ ໃນສະຖານະການໃໝ່, ສອງຝ່າຍຄວນເພີ່ມທະວີການແລກປ່ຽນສື່ສານກັນທາງຍຸດທະສາດຕື່ມອີກ, ຮັບມືກັບສິ່ງທ້າທາຍໃຫ້ເໝາະສົມ, ເພີ່ມຄວາມໄວ້ເນື້ອເຊື່ອໃຈກັນທາງການເມືອງ, ລົງເລິກການຮ່ວມມືຕົວຈິງ, ເປີດກວ້າງການແລກປ່ຽນດ້ານວັດທະນະທຳ ເພື່ອຮ່ວມກັນປົກປັກຮັກສາສັນຕິພາບ,ສະຖຽນລະພາບກັບການພັດທະນາແລະຄວາມຈະເລີນຮຸ່ງເຮືອງ.
ເຈົ້າໜ້າທີ່ລັດຖະບານ, ຊ່ຽວຊານ,ນັກວິຊາການແລະຜູ້ແທນສື່ມວນຊົນຈາກ ຈີນແລະບັນດາປະເທດໃນອາຊຽນ 120 ກວ່າຄົນໄດ້ເຂົ້າຮ່ວມກອງປະຊຸມຄັ້ງນີ້.