ອີຣານແລະສະຫະພາບເອີຣົບເລີ່ມຮ່ວມມືດ້ານຄວາມປອດໄພນິວເຄລຍ

ສື່ມວນຊົນອີຣານລາຍງານໃນວັນທີ 15 ກໍລະກົດນີ້ວ່າ: ກ່ອນໜ້ານີ້ບໍ່ດົນ, ອີຣານແລະສະຫະພາບເອີຣົບໄດ້ຮ່ວມກັນເປີດໂຄງການຮ່ວມມືດ້ານຄວາມປອດໄພນິວເຄລຍ.

ໜັງສືພິມ Financial Tribune daily ຂອງອີຣານລາຍງານວ່າ: ກ່ອນໜ້ານີ້ບໍ່ດົນ, ຫຼັງທ່ານອາລີ ອັກບາ ຊາເລຮີ ຫົວໜ້າສູນຄວາມປອດໄພນິວເຄລຍອີຣານໄດ້ພົບປະເຈລະຈາກັບທ່ານໂອລີເວີ ລູອິກສ ຜູ້ຊີ້ນຳພະແນກຄວາມປອດໄພນິວເຄລຍສະຫະພາບເອີຣົບກໍໄດ້ປະກາດຢ່າງເປັນທາງການວ່າ ສອງຝ່າຍເລີ່ມປະຕິບັດໂຄງການຮ່ວມມືຄວາມປອດໄພນິວເຄລຍທີ່ມີມູນຄ່າປະມານ 2 ລ້ານ 8 ແສນ 5 ໝື່ນໂດລາສະຫະລັດ.

ໂຄງການດັ່ງກ່າວເປັນສ່ວນໜຶ່ງຂອງແຜນໂຄງການຮ່ວມມືລວມທີ່ມີມູນຄ່າ 5 ລ້ານ 7 ແສນໂດລາສະຫະລັດທີ່ອີຣານແລະສະຫະພາບເອີຣົບໄດ້ລົງນາມເມື່ອປີ 2016 ຜ່ານມາ ເພື່ອຊ່ວຍອີຣານເສີມສ້າງຄວາມສາມາດຮັກສາຄວາມປອດໄພນິວເຄລຍດ້ານຕ່າງໆໃຫ້ເຂັ້ມແຂງຂຶ້ນ ລວມທັງການສ້າງສູນຄວາມປອດໄພນິວເຄລຍ.

ຕາມສັນຍາ, ສະຫະພາບເອີຣົບຈະສະໜັບສະໜູນພາກສ່ວນຕິດຕາມກວດກາຄວາມປອດໄພນິວເຄລຍຂອງອີຣານສ້າງຕັ້ງຂອບມາດຕະຖານເຕັກນິກ ທັງສະໜັບສະໜູນເຂົ້າຮ່ວມກອງປະຊຸມສາກົນຕ່າງໆກ່ຽວກັບເຕັກນິກນິວເຄລຍ.