ຕອນຄ່ຳວັນທີ 15 ກໍລະກົດນີ້ ຢູ່ເຂດທະເລໃກ້ແຂວງໂກໂຣນຕາໂລ ປະເທດອິນໂດເນເຊຍ ໄດ້ເກີດແຜ່ນດິນໄຫວລະດັບ 6,0 ລິກເຕີ ແລະປັດຈຸບັນຍັງບໍ່ທັນມີລາຍງານຜູ້ເສຍຊີວິດ ຫຼື ບາດເຈັບ ກໍຄືຄວາມເສຍຫາຍທາງຊັບສິນເທື່ອ.
ເວັບໄຊກົມອຸຕິນິຍົມ, ດິນຟ້າອາກາດ ແລະ ຟິຊິກໂລກອິນໂດເນເຊຍ ໄດ້ລາຍງານຂ່າວວ່າແຜ່ນດິນໄຫວໄດ້ເກີດຂຶ້ນໃນເວລາ 20:12 ໂມງ ຫຼື 19:12 ໂມງຕາມເວລາໃນລາວ ເຊິ່ງຈຸດໃຈກາງແຜ່ນດິນໄຫວຢູ່ເຂດທະເລຫ່າງຈາກໂກໂຣນຕາໂລ ເທດສະບານແຂວງໂກໂຣນຕາໂລປະມານ 116 ກິໂລແມັດ ແລະເລິກລົງໄປໃຕ້ດິນ 100 ກິໂລແມັດ. ຂະນະທີ່ອົງການຕິດຕາມແຜ່ນດິນໄຫວອິນໂດເນເຊຍ ບໍ່ໄດ້ແຈ້ງເຕືອນໄພສຶນາມິຫຼັງເກີດແຜ່ນດິນໄຫວດັ່ງກ່າວ.
ຂ່າວລາຍງານຕື່ມວ່າ: ຜົນການວັດແທກຈາກອົງການສຳຫຼວດທໍລະນີສາດອາເມລິກາປາກົດວ່າ ແຜ່ນດິນໄຫວດັ່ງກ່າວມີລະດັບ 5,9 ລິກເຕີ ແລະ ຈຸດໃຈກາງແຜ່ນດິນໄຫວເລິກລົງໄປໃຕ້ດິນ 114,5 ກິໂລແມັດ.