ອິສຣາແອນປະກາດໃນວັນທີ 15 ກໍລະກົດນີ້ວ່າ ຈະເປີດສຸເຫຼົ່າອັກຊາ ພ້ອມທັງພູວັດ(Temple Mount) ຈຸດທີ່ຕັ້ງຂອງສຸເຫຼົ່າ ຢູ່ເຂດເມືອງເກົ່າເຢຣູຊາແລມ ແລະ ຈະນຳໃຊ້ມາດຕະການປ້ອງກັນຄວາມປອດໄພໃຫ້ເຂັ້ມງວດກວ່າເກົ່າ ຫຼັງເປີດບໍລິການ.
ຕອນຮຸ່ງເຊົ້າວັນທີ 14 ກໍລະກົດນີ້ ຢູ່ເຂດເມືອງເກົ່າເຢຣູຊາແລມ ມີຄົນຮ້າຍ 3 ຄົນໄດ້ຍິງປືນໃສ່ຕຳຫຼວດອິສຣາແອນ 3 ຄົນຢູ່ນອກວັດພູ ສົ່ງຜົນເຮັດໃຫ້ຕຳຫຼວດ 2 ຄົນເສຍຊີວິດຫຼັງທົນບາດເຈັບບໍ່ໄຫວ, ຂະນະທີ່ຜູ້ກໍ່ເຫດກໍຖືກເຈົ້າໜ້າທີ່ຕຳຫຼວດສັງຫານ.
ຫຼັງເກີດເຫດ, ອິສຣາແອນກໍໄດ້ປິດລ້ອມສຸເຫຼົ່າອັກຊາ ແລະ ຫ້າມບໍ່ໃຫ້ຊາວມຸສລິມເຂົ້າໄປປະກອບພິທີ ແລະໃນເວລາຕໍ່ມາ ທ່ານອິກເລມາ ຊາບຣີ ຜູ້ນຳສາສະໜາມຸສລິມເຢຣູຊາແລມ ໄດ້ປະນາມອິສຣາແອນທີ່ປິດສຸເຫຼົ່າດັ່ງກ່າວ.