ທ່ານຟິລິບ ຮາມົງ ລັດຖະມົນຕີກະຊວງການເງິນອັງກິດ ໄດ້ຢືນຢັນໃນວັນທີ 16 ກໍລະກົດນີ້ວ່າ: ເພື່ອບໍ່ໃຫ້ເສດຖະກິດປະເທດຕົນຖືກກະທົບຢ່າງໜັກ, ລັດຖະບານໄດ້ຮັບຮອງມາດຕະການຊົ່ວຄາວ ຫຼັງຖອນອອກຈາກສະຫະພາບເອີຣົບ ຫຼື ອີຢູ.
ທັງນີ້, ທ່ານຮາມົງ ໄດ້ໃຫ້ສຳພາດຕໍ່ສື່ມວນຊົນອັງກິດວ່າ: ການໃຊ້ມາດຕະການຊົ່ວຄາວກໍຄືຮູບການພໍດີແລະສົມເຫດສົມຜົນເພື່ອຫຼຸດຜ່ອນຜົນກະທົບທີ່ມີຕໍ່ເສດຖະກິດປະເທດຕົນຈາກການຖອນອອກຈາກອີຢູ. ເນື່ອງຈາກຜົນສະທ້ອນອັນບໍ່ແນ່ນອນທີ່ເກີດຈາກການຖອນອອກຈາກອີຢູ, ຈະລະງັບການລົງທຶນຢູ່ພາຍໃນປະເທດຂອງວິສາຫະກິດປະເທດຕົນ. ຂະນະທີ່ສະຫະພັນອຸດສາຫະກຳອັງກິດກໍໄດ້ດຳເນີນການສຳຫຼວດເທື່ອໜຶ່ງ ໂດຍປາກົດວ່າ ບໍລິສັດພາຍໃນປະເທດ 42% ເຫັນວ່າ, ການຖອນອອກຈາກອີຢູ ໄດ້ກະທົບເຖິງແຜນການລົງທຶນຂອງຕົນ. ດ້ວຍເຫດນີ້, ອົງການດັ່ງກ່າວຈຶ່ງໄດ້ຮຽກຮ້ອງໃຫ້ລັດຖະບານຈົ່ງສ້າງສັນຍາການຄ້າລະຫວ່າງອັງກິດແລະອີຢູສະບັບໃໝ່ຂຶ້ນໂດຍໄວ.
ຂ່າວລາຍງານຕື່ມວ່າ: ວັນທີ 17 ກໍລະກົດນີ້, ທ່ານດາວິດ ດາວິສ ລັດຖະມົນຕີກິດຈະການອັງກິດຖອນອອກຈາກອີຢູ ຈະເດີນທາງເຖິງນະຄອນຫຼວງບຣຸກແຊນ ປະເທດແບນຊິກ ເພື່ອເຈລະຈາຮອບໃໝ່ກັບເຈົ້າໜ້າທີ່ອີຢູກ່ຽວກັບການຖອນອອກຈາກອີຢູຂອງອັງກິດ.