ເຈົ້າໜ້າທີ່ກະຊວງ ປກສ ຈີນເປີດເຜີຍໃນວັນທີ 14 ກໍລະກົດນີ້ວ່າ, ເມື່ອມໍ່ໆມານີ້, ກະຊວງຕົນໄດ້ມອບໝາຍໃຫ້ກອງບັນຊາການ ປກສ ແຂວງຫູໜານດຳເນີນການເຄື່ອນໄຫວປາບຂະບວນການຫຼອກຂາຍແມ່ຍິງສັນຊາດຫວຽດນາມ ແລະກໍສາມາດຊ່ວຍພວກເຂົາໄດ້ 25 ຄົນ, ຂະນະດຽວກັນກໍສາມາດຈັບຜູ້ຕ້ອງຫາໄດ້ 30 ຄົນ ໃນນີ້ເປັນຜູ້ຕ້ອງຫານາຍໜ້າຊື້ 13 ຄົນ, ແກ້ໄຂຄະດີຫຼອກຂາຍແມ່ຍິງ 20 ຄະດີ ແລະທຳລາຍຂະບວນການຫຼອກຂາຍແມ່ຍິງຈາກຊາຍແດນຫວຽດນາມ-ຈີນ, ຜ່ານເມືອງເຫີໂຂແຂວງຢຸນນານໄປຫາເມືອງຊິ່ນຮວ້າແຂວງຫູໜານ.
ເຈົ້າໜ້າທີ່ກົມສືບສວນຄະດີອາຍາກະຊວງດັ່ງກ່າວກ່າວວ່າ, ຫຼາຍປີມໍ່ໆມານີ້, ກະຊວງຕົນໄດ້ເອົາໃຈໃສ່ສູງຕໍ່ການປາບປາມຂະບວນການຄ້າຂາຍມະນຸດໃນຂອບເຂດທົ່ວປະເທດ, ສ້າງລະບຽບການພິເສດສຳລັບຄະດີລັກສະນະນີ້, ຈັບຜູ້ຕ້ອງຫາຄ້າຂາຍມະນຸດໄດ້ຫຼາຍຄົນ ແລະຊ່ວຍເຫຼືອແມ່ຍິງແລະເດັກນ້ອຍທີ່ຖືກຫຼອກຂາຍຫຼາຍຄົນ. ຄະດີຫຼອກຂາຍແມ່ຍິງຫວຽດນາມດັ່ງກ່າວ, ນອກຈາກລະເມີດກົດໝາຍອາຍາຈີນແລ້ວ, ຍັງພົວພັນເຖິງການທູດ, ຄວາມໝັ້ນຄົງຢູ່ເຂດຊາຍແດນ, ຮີດຄອງປະເພນີ ແລະອື່ນໆ ເຊິ່ງກະຊວງຕົນຈະສືບຕໍ່ປາບປາມຂະບວນການນີ້ຢ່າງເຂັ້ມງວດ ເພື່ອບໍ່ໃຫ້ເກີດມີອີກ.