ລະບົບລົດໄຟໃຕ້ດິນສາຍທຳອິດໃນຕົວເມືອງນະຄອນຫຼວງກົວລາລຳເປີ ຫຼື KVMRT ປະເທດມາເລເຊຍ ທີ່ຍາວ 51 ກິໂລແມັດ ແລະ ລົງທຶນເຖິງ 21 ຕື້ຣິງກິດ ໄດ້ເລີ່ມເປີດບໍລິການແລ້ວໃນວັນທີ 17 ກໍລະກົດນີ້, ຂະນະທີ່ທ່ານນາຈິບ ຕຸນ ຣາຊັກ ນາຍົກລັດຖະມົນຕີມາເລເຊຍ ໄດ້ກ່າວໃນພິທີວ່າ ລະບົບການຄົມມະນາຄົມດັ່ງກ່າວມີລະດັບກ້າວໜ້າໃນໂລກ.
ລະບົບລົດໄຟໃຕ້ດິນໃນຕົວເມືອງກົວລາລຳເປີ ມີ 31 ສະຖານີ ໃນນີ້ 7 ສະຖານີຢູ່ເຂດໃຈກາງເມືອງໄດ້ສ້າງຢູ່ໃຕ້ດິນ ແລະ ອີກ 24 ສະຖານີເປັນສະຖານີລອຍຟ້າ.
ກ່ອນໜ້ານີ້, ການຄົມມະນາຄົມຂົນສົ່ງລະບົບລາງລົດໄຟຢູ່ນະຄອນຫຼວງກົວລາລຳເປີມີ ລົດໄຟທຳມະດາ, ລົດໄຟໃຊ້ພະລັງງານໄຟຟ້າ, ລົດໄຟລາງດ່ຽວ ແລະ ລົດໄຟລອຍຟ້າ ຫຼື LRT ແຕ່ບໍ່ມີລົດໄຟໃຕ້ດິນ ຫຼື MRT, ແຕ່ເທື່ອນີ້ KVMRT ໄດ້ເລີ່ມເປີດບໍລິການຕະຫຼອດສາຍນັ້ນ ເປັນການບັນທຶກປະຫວັດສາດຂອງລະບົບການຄົມມະນາຄົມສາທາລະນະໜ້າໃໝ່ຂອງປະເທດມາເລເຊຍ.
ໂຄງການ KVMRT ແມ່ນໜຶ່ງໃນໂຄງການຕ່າງໆທີ່ສຳຄັນ ທີ່ນອນຢູ່ໃນ "ແຜນການມະຫານະຄອນກົວລາລຳເປີ" ທີ່ລັດຖະບານມາເລເຊຍວາງອອກເມື່ອປີ 2010 ແລະ ເລີ່ມລົງມືກໍ່ສ້າງໃນເດືອນພະຈິກປີ 2011ເພື່ອສົມທົບກັບແຜນການຫັນປ່ຽນໂຄງສ້າງເສດຖະກິດ.
