ສື່ມວນຊົນຟິລິບປິນລາຍງານວ່າ: ນັບແຕ່ເດືອນທັນວາປີ 2016 ເປັນຕົ້ນມາ, ກົມຄຸ້ມຄອງຄົນຕ່າງປະເທດເລີ່ມຈ້າງຜູ້ແປພາສາຈີນ ເພື່ອແກ້ໄຂບັນຫາພາສາຂະນະທີ່ເຈົ້າໜ້າທີ່ສອບຖາມນັກທ່ອງທ່ຽວຈີນຢູ່ສະໜາມບິນ ເຊິ່ງກໍໄດ້ຮັບຜົນດີ ໂດຍເຫັນໄດ້ຈາກການປະຕິເສດພົນລະເມືອງຈີນບໍ່ໃຫ້ເຂົ້າເມືອງຢູ່ສະໜາມບິນມະນີລາແຕ່ເດືອນມັງກອນຫາເດືອນມິຖຸນາປີນີ້ ໄດ້ຫຼຸດໜ້ອຍລົງກວ່າ 20% ເມື່ອທຽບໃສ່ 6 ເດືອນທ້າຍປີຜ່ານມາ.
ນັບແຕ່ທ່ານໂຣດຣີໂກ ດູເຕີເຕ ຂຶ້ນດຳລົງຕຳແໜ່ງປະທານາທິບໍດີຟິລິບປິນເປັນຕົ້ນມາ, ທ່ານໄດ້ຕັ້ງໜ້າຊຸກຍູ້ການພົວພັນທາງການຄ້າກັບຈີນ, ລັດຖະບານສອງປະເທດກໍຮ່ວມມືເພື່ອຊຸກຍູ້ຕະຫຼາດນັກທ່ອງທ່ຽວສອງຝ່າຍ. ຂະນະທີ່ຂະແໜງການທ່ອງທ່ຽວຟິລິບປິນໄດ້ເປີດເຜີຍວ່າ ນັບແຕ່ເດືອນມິຖຸນາປີ 2016 ເປັນຕົ້ນມາ, ນັກທ່ອງທ່ຽວຈີນເຂົ້າທ່ອງທ່ຽວປະເທດຕົນໄດ້ກວມເອົາ 36,3% ຂອງນັກທ່ອງທ່ຽວສາກົນ ແລະ ຈີນໄດ້ກາຍເປັນໜຶ່ງໃນບັນດາຕະຫຼາດນັກທ່ອງທ່ຽວທີ່ສຳຄັນຂອງຟິລິບປິນ.
ສື່ມວນຊົນຟິລິບປິນ ຍັງລາຍງານວ່າ: ປັດຈຸບັນ, ນັກທ່ອງທ່ຽວຈີນເຂົ້າຟິລິບປິນ ແລະ ນັກທ່ອງທ່ຽວຟິລິບປິນເຂົ້າຈີນ ຕ້ອງໄດ້ຂໍວີຊາທ່ອງທ່ຽວກ່ອນ, ແຕ່ປັດຈຸບັນ ອົງການການຕ່າງປະເທດ ແລະ ການທ່ອງທ່ຽວຂອງສອງປະເທດພວມປຶກສາຫາລືຢ່າງລະອຽດ ເພື່ອເຮັດໃຫ້ລະບຽບການເຂົ້າເມືອງຂອງນັກທ່ອງທ່ຽວແຕ່ລະຝ່າຍກະທັດຮັດງ່າຍຂຶ້ນກວ່າເກົ່າ ຈົນກ້າວໄປສູ່ການຍົກເວັ້ນວີຊາໃນທີ່ສຸດ.
