ຫວ່າງມໍ່ໆມານີ້, ທ່ານນາງ ແອນເຈີລາ ເມີເຄວ ນາຍົກລັດຖະມົນຕີເຢຍລະມັນໄດ້ຢ້ຳຂະນະທີ່ໃຫ້ສຳພາດຕໍ່ສະຖານີໂທລະພາບແຫ່ງໜຶ່ງຂອງປະເທດຕົນວ່າ: ຈະບໍ່ຈຳກັດການຮັບເອົາຊາວອົບພະຍົບເຂົ້າປະເທດ. ທັງນີ້ການຈຳກັດຮັບເອົາຊາວອົບພະຍົບບໍ່ແມ່ນເປົ້າໝາຍໃນອະນາຄົດ ແຕ່ກໍສາມາດວາງຂໍ້ກຳນົດຕ່າງໆແລະໃຊ້ມາດຕະການເພື່ອຫຼີກເວັ້ນການຫຼັ່ງໄຫຼເຂົ້າເມືອງຂອງຊາວອົບພະຍົບເກີດຂຶ້ນ.
ເຢຍລະມັນແມ່ນໜຶ່ງໃນບັນດາປະເທດເອີຣົບທີ່ຮັບເອົາຊາວອົບພະຍົບຫຼາຍທີ່ສຸດ ເຊິ່ງອີງຕາມສະຖິຕິທາງການເຫັນວ່າ: ນັບແຕ່ເກີດວິກິດການຊາວອົບພະຍົບຢູ່ເອີຣົບໃນປີ 2015 ຜ່ານມາ, ໄດ້ມີຊາວອົບພະຍົບ 1 ລ້ານກວ່າຄົນເຂົ້າໄປເຢຍລະມັນ. ຄຽງຄູ່ກັບການຂາດດຸນງົບປະມານທີ່ເພີ່ມຂຶ້ນສົ່ງຜົນເຮັດໃຫ້ບັນຫາໃນສັງຄົມເກີດຂຶ້ນ ແລ້ວຍັງເຮັດໃຫ້ປະຊາຊົນເຢຍລະມັນຈຳນວນໜຶ່ງບໍ່ພໍໃຈໃນນະໂຍບາຍຕໍ່ຊາວອົບພະຍົບໃນປັດຈຸບັນ. ແນວໃດກໍດີເນື່ອງຈາກລັດຖະບານເຢຍລະມັນໄດ້ຮັດກຸມເງື່ອນໄຂການຮັບເອົາຊາວອົບພະຍົບນັບແຕ່ປີ 2016 ເປັນຕົ້ນມາ, ມາຮອດປັດຈຸບັນຈຳນວນຊາວອົບພະຍົບທີ່ເພີ່ມໃໝ່ໄດ້ຫຼຸດລົງຢ່າງຈະແຈ້ງ.