ກົງສຸນໃຫຍ່ຈີນປະຈຳສົງຂາປະເທດໄທຖະແຫຼງໃນວັນທີ 18 ກໍລະກົດນີ້ວ່າ: ເມື່ອບໍ່ດົນມານີ້, ນັກທ່ອງທ່ຽວຊາຍຈີນ 3 ຄົນໄດ້ລົງອາບນ້ຳທະເລຢູ່ພູເກັດ ແຫຼ່ງທ່ອງທ່ຽວຂອງໄທ ໂດຍບໍ່ຫົວຊາຕໍ່ການເຕືອນໄພຈາກຟອງທະເລ ແລະ ໃນທີ່ສຸດກໍມີ 2 ຄົນຈົມນ້ຳຕາຍ. ແນວໃດກໍດີ, ກົງສຸນໃຫຍ່ໄດ້ເຕືອນອີກຄັ້ງໃໝ່ວ່າ ນັກທ່ອງທ່ຽວຈີນທີ່ໄປທ່ຽວໄທຕ້ອງລະວັງຄວາມປອດໄພໃນໄລຍະລະດູຝົນ.
ຂ່າວແຈ້ງວ່າ: ນັກທ່ອງທ່ຽວ 3 ຄົນນີ້ລ້ວນແຕ່ມີອາຍຸ 20 ກວ່າປີ ແລະມາຈາກຊຽງໄຮ. ຂະນະທີ່ໃນເວລາປະມານ 13:00 ໂມງຂອງວັນທີ 16 ກໍລະກົດນີ້, 3 ຄົນດັ່ງກ່າວໄດ້ລົງອາບນ້ຳທະເລຢູ່ຫາດຊາຍທະເລສ່ວນຕົວແຫ່ງໜຶ່ງຢູ່ພູເກັດ ໂດຍບໍ່ຫົວຊາຕໍ່ສະພາບອາກາດທີ່ມີລົມແຮງແລະຟອງທະເລໃຫຍ່ ທັງໆຢູ່ຫາດຊາຍກໍໄດ້ປັກທຸງເຕືອນໄພແລ້ວ ເຊິ່ງເວລາຕໍ່ມາມີ 2 ຄົນຫາຍສາບສູນ ແລະ ມາຮອດວັນທີ 17, ອົງການທີ່ກ່ຽວຂ້ອງຂອງໄທກໍໄດ້ຂະຫຍາຍຂອບເຂດການຄົ້ນຫາ ແລະສາມາດພົບສົບ 2 ຄົນນັ້ນໃນຕອນບ່າຍວັນທີ 18 ເດືອນດຽວກັນ.
