ວັນທີ 18 ກໍລະກົດນີ້, ທ່ານ ເອເນສໂຕ ອາເບວລາ ໂຄສົກທຳນຽບປະທານາທິບໍດີຟີລິບປິນກ່າວວ່າ: ທ່ານ ໂຣດຣີໂກ ດູເຕີເຕ ປະທານາທິບໍດີຟີລິບປິນຕ້ອງການໃຫ້ແກ່ຍາວການປະກາດພາວະສຸກເສີນຢູ່ເຂດມິນດານາວແລະແຫ່ງອື່ນໆ ທາງພາກໃຕ້ຂອງປະເທດໄປຈົນເຖິງທ້າຍປີນີ້ ເພື່ອແກ້ໄຂການປະທະກັນດ້ວຍກຳລັງອາວຸດຢູ່ເຂດດັ່ງກ່າວ.
ອີງຕາມລັດຖະທຳມະນູນຟີລິບປິນ, ປະທານາທິບໍດີມີສິດປະກາດພາວະສຸກເສີນພາຍໃນຂອບເຂດໃດໜຶ່ງແຕ່ບໍ່ໃຫ້ເກີນກວ່າ 60 ວັນ. ຫຼັງຈາກຄຳສັ່ງເຖິງເວລາກຳນົດແລ້ວ, ຖ້າປະທານາທິບໍດີສະເໜີແລະໄດ້ຮັບການເຫັນດີຈາກສະພາແຫ່ງຊາດແລ້ວ ກໍຈະສາມາດແກ່ຍາວການປະກາດພາວະສຸກເສີນໄດ້.
ໃນມື້ດຽວກັນ,ທ່ານ ເອເດີວາໂດ ອາໂນ ຫົວໜ້າກົມໃຫຍ່ເສນາທິການ ກອງທັບຟີລິບປິນກ່າວວ່າ: ປັດຈຸບັນ, ສົງຄາມມາລາວີຍັງບໍ່ສິ້ນສຸດເທື່ອ,ຖ້າສາມາດແກ່ຍາວການປະກາດພາວະສຸກເສີນອີກ 5 ເດືອນ ກໍຈະສາມາດແກ້ໄຂບັນຫາດັ່ງກ່າວໄດ້.
 |
