ສື່ມວນຊົນອິນໂດເນເຊຍລາຍງານໃນວັນທີ 18 ກໍລະກົດນີ້ວ່າ: ວັນທີ 17 ກໍລະກົດນີ້ ຢູ່ນະຄອນຫຼວງຈາກາຕາ, ທ່ານ ອາກູສ໌ຣາຮາດໂຈ ປະທານຄະນະກຳມະການຕ້ານການສໍ້ລາດບັງຫຼວງອິນໂດເນເຊຍກ່າວຕໍ່ສື່ມວນຊົນວ່າ: ທ່ານ ເຊັດຢາ ໂນວານໂຕ ປະທານສະພາແຫ່ງຊາດອິນໂດເນເຊຍໃນປັດຈຸບັນໄດ້ກາຍເປັນຜູ້ຕ້ອງສົງໄສເຕັມໂຕແລະຖ້າມີຫຼັກຖານແໜ້ນກໍຈະຖືກຕິດຄຸກ 20 ປີເປັນຢ່າງໜ້ອຍ ແລະຖືກປັບໃໝ 1 ຕື້ຣູເປຍຫຼືປະມານ 76.100 ໂດລາສະຫະລັດ.
ວັນທີ 9 ມີນາປີນີ້, ບຸກຄົນໃນວົງການການເມືອງຫຼາຍທ່ານຂອງອິນໂດເນເຊຍຖືກກ່າວຟ້ອງໃນຂໍ້ຫາມີສ່ວນກ່ຽວຂ້ອງກັບການສໍ້ລາດບັງຫຼວງໂດຍສະເພາະຄະດີການຈັດຊື້ບັດປະຈຳຕົວເອເລັກໂຕຣນິກທີ່ມີມູນຄ່າເຖິງ 170 ລ້ານໂດລາສະຫະລັດ ທັງລັດຖະມົນຕີຊຸດປັດຈຸບັນແລະອະດີດລັດຖະມົນຕີກໍຄືເຈົ້າໜ້າທີ່ລັດຖະບານຫຼາຍທ່ານແລະນັບແຕ່ວັນທີ 10 ເມສາປີນີ້ເປັນຕົ້ນມາ, ທ່ານ ເຊັດຢາ ໂນວານໂຕ ໄດ້ຖືກກົມກວດກາຄົນເຂົ້າອອກເມືອງອິນໂດເນເຊຍຫ້າມອອກນອກປະເທດເປັນເວລາ 6 ເດືອນຫຼັງສົງໄສມີສ່ວນກ່ຽວຂ້ອງກັບຄະດີດັ່ງກ່າວ.
ໂຄງການຈັດຊື້ບັດປະຈຳຕົວເອເລັກໂຕຣນິກຂອງອິນໂດເນເຊຍໄດ້ໃຊ້ງົບປະມານ 5.900 ຕື້ຣູເປຍຫຼືປະມານ 449 ລ້ານໂດລາສະຫະລັດ, ແຕ່ຕົວຈິງໃຊ້ແຕ່ 51% ເທົ່ານັ້ນ, ສ່ວນ 49% ແບ່ງປັນໃຫ້ແກ່ສະມາຊິກສະພາແຫ່ງຊາດ,ເຈົ້າໜ້າທີ່ກະຊວງພາຍໃນກໍຄືຝ່າຍປະຕິບັດໂຄງການຫຼືວິສາຫະກິດຄູ່ຮ່ວມມື ເຊິ່ງກ່ຽວພັນເຖິງຫຼາຍສິບຄົນ.