ທ່ານລູ້ຄ່າງ ໂຄສົກກະຊວງການຕ່າງປະເທດຈີນ ໄດ້ກ່າວໃນພິທີຖະແຫຼງຂ່າວໃນວັນທີ 20 ກໍລະກົດນີ້ວ່າ: ຈີນຊົມເຊີຍຕໍ່ການຈະຈັດພິທີສ້າງຕັ້ງສະມາຄົມການຮ່ວມມືການເງິນອາຊີຂຶ້ນຢູ່ນະຄອນຫຼວງປັກກິ່ງໃນວັນທີ 24 ກໍລະກົດນີ້. ຂະນະທີ່ມາເຖິງປັດຈຸບັນໄດ້ມີ 107 ອົງການຈາກ 5 ທະວີບເຂົ້າຮ່ວມເປັນສະມາຊິກຜູ້ກໍ່ຕັ້ງສະມາຄົມດັ່ງກ່າວແລ້ວ.
ທ່ານລູ້ຄ່າງ ກ່າວວ່າ: ຈີນສຸມໃສ່ຊຸກຍູ້ເພີ່ມທະວີການແລກປ່ຽນແລະຮ່ວມມືລະຫວ່າງສະຖາບັນການເງິນພາກພື້ນມາໂດຍຕະຫຼອດ ໂດຍເຫັນໄດ້ເມື່ອເດືອນມີນາປີ 2015, ທ່ານສີຈິ້ນຜິງ ປະທານປະເທດຈີນໄດ້ສະເໜີໃນກອງປະຊຸມປະຈຳປີເວທີປຶກສາຫາລືອາຊີໂປອາວ ໂດຍໃຫ້ຄົ້ນຄວ້າການສ້າງເວທີແລກປ່ຽນແລະຮ່ວມມືລະຫວ່າງສະຖາບັນການເງິນອາຊີ. ຈາກນັ້ນ, ທ່ານຫຼີເຄີ້ສຽງ ນາຍົກລັດຖະມົນຕີຈີນ ກໍໄດ້ສະເໜີຂໍ້ລິເລີ່ມສ້າງຕັ້ງສະມາຄົມການຮ່ວມມືການເງິນອາຊີຫຼາຍເທື່ອ ແລະພວກເຮົາກໍດີໃຈທີ່ໄດ້ເຫັນຂໍ້ລິເລີ່ມດັ່ງກ່າວຂອງຜູ້ນຳຈີນໄດ້ຮັບການຕອບຮັບຢ່າງຕັ້ງໜ້າແລະການສະໜັບສະໜູນຢ່າງໃຫຍ່ຈາກສະຖາບັນການເງິນອາຊີກໍຄືພາກພື້ນອື່ນໆ.
ທ່ານລູ້ຄ່າງ ໃຫ້ຮູ້ຕື່ມວ່າ: ສະມາຄົມການຮ່ວມມືການເງິນອາຊີໄດ້ສ້າງຕັ້ງຂຶ້ນຢ່າງເປັນທາງການໃນວັນທີ 11 ພຶດສະພາປີນີ້ ໂດຍມີສຳນັກງານໃຫຍ່ຕັ້ງຢູ່ນະຄອນຫຼວງປັກກິ່ງ ແລະຖືວ່າເປັນຜົນງານໜຶ່ງທີ່ເກີດຈາກເວທີປຶກສາຫາລືສຸດຍອດການຮ່ວມມືສາກົນ "ໜຶ່ງແລວທາງໜຶ່ງເສັ້ນທາງ".
