ເວັບໄຊກະຊວງການຄ້າຈີນໄດ້ອ້າງຕາມການລາຍງານຂ່າວຈາກໜັງສືພິມການຄ້າຟິລິບປິນຫວ່າງມໍ່ໆນີ້ວ່າ: ບໍລິສັດ BMI ໄດ້ເປີດເຜີຍບົດລາຍງານ ໂດຍລະບຸວ່າ ແຕ່ປີ 2017-2021, ຟິລິບປິນ ແລະ ຫວຽດນາມຈະກາຍເປັນສູນກາງຜະລິດລົດທີ່ພັດທະນາໄວກວ່າໝູ່ຢູ່ອາຊີຕາເວັນອອກສຽງໃຕ້ ໂດຍຟິລິບປິນຈະຜະລິດໄດ້ເຖິງ 3 ແສນ 5 ໝື່ນ 9000 ຄັນ ເຕີບໂຕ 300% ແລະ ຫວຽດນາມຈະຜະລິດເພີ່ມຂຶ້ນທົບເທົ່າ ຄື ໃຫ້ໄດ້ 1 ແສນ 1 ໝື່ນ 2000 ຄັນ.
ປີຜ່ານມາ, ເສດຖະກິດຟິລິບປິນ ແລະ ຫວຽດນາມໄດ້ເຕີບໂຕກວ່າ 6% ເຊິ່ງນຳໜ້າໃນໂລກ. ຂະນະທີ່ການຈຳໜ່າຍລົດຂອງສອງປະເທດດັ່ງກ່າວໄດ້ເພີ່ມຂຶ້ນຢ່າງຫຼວງຫຼາຍ ຕົ້ນຕໍແລ້ວເປັນຜົນມາຈາກເສດຖະກິດໄດ້ຮັບການພັດທະນາຢ່າງຄຶກຄັກ, ລາຍຮັບສະເລ່ຍຕໍ່ຫົວຄົນເພີ່ມຂຶ້ນ ແລະ ພາຍໃນປະເທດມີຜູ້ບໍລິໂພກເປັນຈຳນວນຫຼາຍ. ຂະນະທີ່ບໍລິສັດຜະລິດລົດຕ່າງໆ ກໍພະຍາຍາມເຈາະຕະຫຼາດນີ້. ແນວໃດກໍດີ, BMI ໄດ້ຄາດຄະເນວ່າ ໃນ 5 ປີຕໍ່ໜ້າ, ຢູ່ຟິລິບປິນ ແລະ ຫວຽດນາມ ການຊື້ລົດຈະເພີ່ມຂຶ້ນໂດຍສະເລ່ຍ 15% ຕໍ່ປີ.
