ສື່ມວນຊົນອິນໂດເນເຊຍລາຍງານໃນວັນທີ 20 ກໍລະກົດນີ້ວ່າ, ອີງຕາມດຳລັດເລກທີ 2 ປີ 2017 ວ່າດ້ວຍການຄຸ້ມຄອງອົງການຈັດຕັ້ງສັງຄົມທີ່ທ່ານ ໂຈໂກ ວິໂດໂດ ປະທານາທິບໍດີອິນໂດເນຍລົງນາມໃນວັນທີ 10 ກໍລະກົດນີ້, ທ່ານຢາຊົນນາ ລາວລີ ລັດຖະມົນຕີກະຊວງຕຸລາການແລະສິດທິມະນຸດອິນໂດເນເຊຍໄດ້ປະກາດການຕົກລົງຂອງລັດຖະບານອິນໂດເນເຊຍ ທີ່ຍຸບແນວໂຮມປົດປ່ອຍອິສລາມ ໃນເວລາ 10 ໂມງເຊົ້າວັນທີ 19 ກໍລະກົດນີ້ ເຊິ່ງໝາຍຄວາມວ່າອົງການຈັດຕັ້ງຫົວຮຸນແຮງດັ່ງກ່າວໄດ້ຖືກລັດຖະບານຍຸບຢ່າງເປັນທາງການ.
ທ່ານວິຣັນໂຕ ລັດຖະມົນຕີກະຊວງວຽກງານການເມືອງ, ກົດໝາຍແລະຄວາມໝັ້ນຄົງອິນໂດເນເຊຍໄດ້ອະທິບາຍວ່າ: ໃນຖານະເປັນອົງການນິຕິບັນຍັດ, ອົງການດັ່ງກ່າວບໍ່ໄດ້ຕັ້ງໜ້າເສີມຂະຫຍາຍບົດບາດເຂົ້າຮ່ວມການສ້າງສາປະເທດຊາດ ເຊິ່ງການເຄື່ອນໄຫວກໍລະເມີດຫຼັກການສ້າງຕັ້ງປະເທດແລະລັດຖະທຳມະນູນສະບັບປີ 1945 ຂອງປະເທດ ແລະສ້າງຄວາມວຸ້ນວາຍໃນສັງຄົມ, ເປັນໄພຂົ່ມຂູ່ຕໍ່ຄວາມໝັ້ນຄົງແລະຂໍ້ກຳນົດກົດລະບຽບຕໍ່ຜືນແຜ່ນດິນອັນຄົບຖ້ວນຂອງຊາດ.
ມື້ດຽວກັນ, ທ່ານທາວຟິກ ຮອງປະທານສະພາແຫ່ງຊາດອິນໂດເນເຊຍກໍອອກມາສະແດງຄວາມເຫັນດີຕໍ່ການຕົກລົງຂອງລັດຖະບານ ແລະເຫັນວ່າ ນີ້ເປັນສິດອຳນາດຂອງລັດຖະບານ.
 |
