ການຄ້າຈີນແລະຟີລິບປິນສົດໃສຈາກການປັບປຸງສາຍພົວພັນລະຫວ່າງສອງປະເທດດີຂຶ້ນ

ໜັງສືພິມຟີລິບປິນສຕາສະບັບວັນທີ 20 ກໍລະກົດນີ້ລາຍງານວ່າ, ທ່ານຣາມອນ ໂລເປສ ລັດຖະມົນຕີອຸດສາຫະກຳການຄ້າຟີລິບປິນເປີດເຜີຍເມື່ອມໍ່ໆມານີ້ວ່າ, ຈາກການທີ່ສາຍພົວພັນທາງການເມືອງລະຫວ່າງຈີນແລະຟີລິບປິນນັບມື້ດີຂຶ້ນ ໄດ້ສົ່ງຜົນໃຫ້ແກ່ການພົວພັນທາງການຄ້າລະຫວ່າງສອງປະເທດດີຂຶ້ນ ແລະການລົງທຶນສອງຝ່າຍ. ທັງນີ້ເປັນການຢືນຢັນອີກເທື່ອໜຶ່ງວ່າ ທ່ານໂຣດຣິໂກ ດູເຕີເຕ ປະທານາທິບໍດີຟີລິບປິນໄດ້ຕັ້ງໜ້າປັບປຸງສາຍພົວພັນສອງປະເທດ ເພື່ອນຳເອົາຜົນປະໂຫຍດຕົວຈິງມາສູ່ເສດຖະກິດຂອງປະເທດ.

ທ່ານໂລເປສກ່າວວ່າ, ຍອດມູນຄ່າສົ່ງອອກກັບຈີນ ລວມທັງຮົງກົງຈີນ ຂອງຟີລິບປິນແຕ່ເດືອນມັງກອນເຖິງເດືອນພຶດສະພາປີນີ້ໄດ້ເພີ່ມຂຶ້ນ 34%, ການຄ້າລະຫວ່າງສອງປະເທດນັບມື້ດຸນດ່ຽງ. ເພື່ອຕອບສະໜອງຕາມຄວາມຮຽກຮ້ອງຕ້ອງການຂອງທ່ານດູເຕີເຕທີ່ຈະຊ່ວຍກະສິກອນແລະຊາວປະມົງຟີລິບປິນດີຂຶ້ນ, 18 ວິສາຫະກິດຂອງຈີນໄດ້ຈັດຊື້ສິນຄ້າດ້ວຍມູນຄ່າ 1 ຕື້ 700 ລ້ານໂດລາຈາກ 30 ວິສາຫະກິດຂອງຟີລິບປິນ, ໃນນີ້ສ່ວນຫຼາຍແມ່ນຜະລິດຕະພັນກະສິກຳ ອັນໄດ້ສົ່ງຜົນທີ່ຕັ້ງໜ້າຕໍ່ການສົ່ງອອກແລະສະພາບຂາດດຸນການຄ້າຂອງຟີລິບປິນ.