ວັນທີ 21 ກໍລະກົດນີ້, ສານສູງສຸດຂອງໄທໄດ້ຈັດງານຟັງຄຳໃຫ້ການເທື່ອສຸດທ້າຍກ່ຽວກັບຄະດີຈັດຊື້ເຂົ້າສານຂອງທ່ານນາງ ຍິ່ງລັກ ຊິນນະວັດ ອະດີດນາຍົກລັດຖະມົນຕີ, ນາງໄດ້ຂຶ້ນສານໃນມື້ດັ່ງກ່າວ. ສານສູງສຸດຂອງໄທໄດ້ຕົກລົງຈະປະກາດຜົນການຕັດສິນກ່ຽວກັບຄະດີດັ່ງກ່າວໃນວັນທີ 25 ເດືອນໜ້າ.
ສານດັ່ງກ່າວເຫັນວ່າຄຳເວົ້າຂອງຝ່າຍທ່ານນາງ ຍິ່ງລັກ ຊິນນະວັດທີ່ວ່າຂັ້ນຕອນກົດໝາຍທີ່ກ່ຽວຂ້ອງກັບຄະດີດັ່ງກ່າວຖືກສົງໄສລະເມີດລັດຖະທຳມະນູນນັ້ນບໍ່ເປັນຄວາມຈິງ, ສະນັ້ນຈຶ່ງໄດ້ປະຕິເສດຄວາມຮ້ອງຂໍຂອງນາງທີ່ຈະຍື່ນຄະດີດັ່ງກ່າວໄປຍັງສານລັດຖະທຳມະນູນເພື່ອຮັບການສືບສວນສອບສວນຕື່ມອີກ. ວັນທີ 25 ສິງຫາໜ້ານີ້, ສານສູງສຸດຈະປະກາດຜົນການຕັດສິນ,ຖ້າເປັນໂທດແທ້, ນາງອາດຈະຖືກຕັດອິດສະຫຼະພາບເປັນເວລາຍາວທີ່ສຸດ 10 ປີ.
ຂ່າວແຈ້ງວ່າ,ສານສູງສຸດຂອງໄທໄດ້ດຳເນີນການສືບສວນສອບສວນຕໍ່ຄະດີດັ່ງກ່າວເປັນເວລາ 2 ປີ. ໃນເດືອນກຸມພາປີ 2015, ຫ້ອງການໄອຍະການໃຫຍ່ຂອງໄທໄດ້ຮ້ອງຟ້ອງທາງອາຍາທ່ານນາງ ຍິ່ງລັກ ຊິນນະວັດ ຕໍ່ສານສູງສຸດຂອງໄທຢ່າງເປັນທາງການ ໃນຂໍ້ຫານາງໄດ້ລະເມີດກົດໝາຍອາຍາແລະກົດໝາຍວ່າດ້ວຍການຕ້ານການສໍ້ລາດບັງຫຼວງໃນໂຄງການຈັດຊື້ເຂົ້າສານໃນໄລຍະດຳລົງຕຳແໜ່ງນາຍົກລັດຖະມົນຕີ ສົ່ງຜົນເຮັດໃຫ້ການຂາດດຸນງົບປະມານແລະການສະສົມທັນຍາຫານໄວ້ຫຼາຍເກີນໄປ.